డీల్ రేట్లను పెంచే ఆలోచనలో సాప్ట్‌వేర్ దిగ్గజం టీసీఎస్‌

న్యూఢిల్లీ: ప్రముఖ సాఫ్ట్‌వేర్‌ సంస్థ టీసీఎస్‌ తమ డీల్‌ రేట్లను పెంచే యోచన చేస్తోంది. అమెరికా, యూరప్‌లతో సహా అన్ని ప్రాంతాలలో కుదుర్చుకునే ఒప్పందాలపై ఈ ధరల ప్రభావం ఉండవచ్చనే అభిప్రాయాన్ని టీసీఎస్‌ సీఈఓ, మేనేజింగ్‌ డైరెక్టర్‌ ఎన్‌. చంద్రశేఖరన్‌ తెలిపారు. ప్రస్తుత ధరలకు 2 నుంచి 3 శాతం పెరిగే వీలుందని సూత్రప్రాయంగా పేర్కొన్నారు. ఈ క్రమంలోనే గత కొద్ది నెలలుగా కుదిరిన ఒప్పందాలపై పెరిగిన ధరలతోనే అగ్రిమెంట్లు చేసుకున్నామన్నారు. ఈ నేపథ్యంలోనే ప్రస్తుతం కొనసాగుతున్న ఒప్పందాలు రెన్యువల్‌ అయ్యే క్రమంలో కొత్త ధరలను పెంచే యోచన ఉందన్నారు. కాగా విదేశాల్లో టీసీఎస్‌ వృద్ధిరేటు ఆశాజనకంగా ఉందని యూరోపియన్‌ రుణ సంక్షోభం, అమెరికా నిరుద్యోగ సమస్యల్లోనూ తమ పనితీరు ఎప్పటిలాగే కొనసాగుతోందని ఈ సందర్భంగా చంద్రశేఖరన్‌ ఆనందం వ్యక్తం చేశారు.

నిజానికి, యూరప్‌, యూఎస్‌లలో నెలకొన్న పరిస్థితుల కారణంగా చాలా దేశాలు ఇబ్బంది పడుతున్నాయని, అయితే తమ సంస్థ కస్టమర్ల విషయంలో ఎలాంటి సమస్యలు రావనే అభిప్రాయాన్ని ఈ సందర్భంగా ఆయన వ్యక్తం చేశారు. ఇదిలావుంటే ప్రస్తుతం భారత ఐటీ రంగం యూరప్‌, యూఎస్‌ల నుంచే 80 శాతం ఆదాయాన్ని పొందుతోంది. ఈ క్రమంలో భారత్‌ ఐటీ రంగంలో అగ్ర స్థానంలో ఉన్న టీసీఎస్‌ వంటి సంస్థలు ధరల పెంపుకు దిగడం విదేశీ ఐటీ ఆర్డర్లపై ప్రభావం కనిపించే వీలు లేకపోలేదని పలువురు మార్కెట్‌ నిపుణులు అభిప్రాయపడుతున్నారు.

English summary

In order to tackle the issue of increasing visa rejections by the US, country's largest software exporter TCS today said it is working on alternatives like raising local hiring at onsites and planning visas much in advance.