ప్రణబ్ పార్లమెంటులో క్షమాపణ చెప్పాలి: హరీష్

By Srinivas

Published: Wednesday, July 20, 2011, 13:01 [IST]

హైదరాబాద్: తెలంగాణపై డిసెంబర్ 9 ప్రకటన తొందరలో తీసుకున్నామని చెప్పిన కేంద్రమంత్రి ప్రణబ్ ముఖర్జీ పార్లమెంటులో క్షమాపణ చెప్పాలని సిద్దిపేట శాసనసభ్యుడు హరీష్ రావు బుధవారం డిమాండ్ చేశారు. తెలుగు ప్రజల మధ్య సహృద్భావం నెలకొనాలంటే రాష్ట్రం విడిపోవడం వల్లనే జరుగుతుందన్నారు. డిసెంబర్ 9న కేంద్రం చేసిన ప్రకటన అనుకోకుండా చేసింది కాదన్నారు. పార్లమెంటులో బిజెపి పోరాటం, తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు ఆమరణ నిరాహారదీక్ష, అసెంబ్లీలో తెలుగుదేశం తదితర విపక్షాల మద్దతు కారణంగా తెలంగాణ ప్రకటించారని గుర్తు చేశారు. డిసెంబర్ 9 ప్రకటన అనుకోకుండా చేస్తే ప్రణబ్ పార్లమెంటులో ఆ తప్పును ఒప్పుకోవాలని డిమాండ్ చేశారు. 14ఎఫ్ తొలగించే వరకు ఎస్ఐ పరీక్షలు నిర్వహించవద్దని ఆయన డిమాండ్ చేశారు. తెలంగాణ ఉద్యమాన్ని అణిచి వేసే ప్రయత్నాలు ప్రభుత్వాలు చేస్తున్నాయని ఆరోపించారు. ఉద్యమాన్ని అణిచివేసే ప్రయత్నాలు చేయవద్దని సూచించారు.

తెలుగుదేశం పార్టీ తెలంగాణకు కట్టుబడి ఉందని ఆ పార్టీ సీనియర్ ఎమ్మెల్యే ఎర్రబెల్లి దయాకర రావు, తెలంగాణ ప్రజా ప్రతినిధులు చెబుతున్నారని, మరి గుంటూరులో సమైక్యాంధ్ర సభ ఎలా నిర్వహిస్తున్నారని ప్రశ్నించారు. చంద్రబాబు నాయుడు తన రెండు కళ్ల సిద్ధాంతాన్ని పక్కన పెట్టాలని సూచించారు. హైదరాబాదులో ఉన్న ప్రజలందరూ తెలంగాణ కోరుకుంటున్నారని చెప్పారు. కేవలం కొందరు పెట్టుబడిదారులు మాత్రమే తెలంగాణను అడ్డుకుంటున్నారని అన్నారు. హైదరాబాదు తెలంగాణలో భాగమే అన్నారు. హైదరాబాదుతో కూడిన తెలంగాణనే తెలంగాణ ప్రజాప్రతినిధులు అందరూ కోరుకుంటున్నారని అన్నారు.

Published On July 20, 2011