వైయస్ జగన్ బండారం బయటపడుతుంది: డిఎల్

Published: Tuesday, July 26, 2011, 16:40 [IST]

హైదరాబాద్: వైయస్సాఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి బండారం బయట పడుతుందని వైద్య ఆరోగ్యశాఖ మంత్రి డిఎల్ రవీంద్రా రెడ్డి మంగళవారం అన్నారు. దివంగత ముఖ్యమంత్రి వైయస్ రాజశేఖర రెడ్డి హయాంలో వైయస్ జగన్మోహన్ రెడ్డికి లాభం చేకూర్చిన ఒప్పందాల్లో 95 శాతం అప్పటి మంత్రివర్గానికి సంబంధం లేకుండా జరిగినవే అని అన్నారు. ఎమ్మార్ అంశం అప్పట్లో ప్రస్తావనకు రాలేదన్నారు. సిబిఐ విచారణలో మరిన్ని నిజాలు బయటకు వస్తాయని ఆయన అభిప్రాయపడ్డారు. జగన్ అక్రమాస్తుల కేసులో ఇంకా చాలా కంపెనీలు విచారణలో తెర పైకి వస్తాయని అన్నారు.

సాక్షిలో రూ.1800 కోట్లు, భారతి సిమెంటులో రూ.1200 కోట్లు పెట్టుబడులు ఎలా వచ్చాయో జగన్ వివరణ ఇవ్వాలని డిమాండ్ చేశారు. ప్రైవేటు, నర్సింగ్ యాజమాన్యాలు సమ్మెకు వెళ్లరని తాను భావిస్తున్నానని అన్నారు. నర్సింగ్, కార్పోరేట్ యాజమాన్యాలు ఈనెల 29న ముఖ్యమంత్రి కిరణ్ కుమార్ రెడ్డితో భేటీ అవుతారని చెప్పారు. ప్రైవేటు హాస్పిటల్స్ ఒత్తిళ్లకు ఎట్టి పరిస్థితుల్లోనూ లొంగేది లేదన్నారు. మెడికల్ చార్జీలు పెంచబోమన్నారు. ఆరోగ్యశ్రీపై ప్రైవేటు యాజమాన్యాలతో చర్చలు జరుగుతున్నాయన్నారు.

Published On July 26, 2011