తెలంగాణపై చంద్రబాబును టార్గెట్ చేసిన కోదండరామ్

హైదరాబాద్: తెలంగాణ అంశంపై తెలంగాణ రాజకీయ జెఎసి చైర్మన్ కోదండరామ్ తెలుగుదేశం పార్టీ అధ్యక్షుడు నారా చంద్రబాబు నాయుడిని టార్గెట్ చేసుకున్నారు. చంద్రబాబు కల్పించిన భ్రమ నుంచి తెలుగుదేశం తెలంగాణ నేతలు బయటపడాలని ఆయన సూచించారు. తెలంగాణపై చంద్రబాబు కేంద్ర ప్రభుత్వాన్ని నిలదీయాలని ఆయన శనివారం మీడియా ప్రతినిధులతో అన్నారు. రెండు ప్రాంతాల నాయకులకు స్వేచ్ఛనిచ్చానని చెబుతున్న చంద్రబాబు తెలంగాణపై తన వైఖరిని ప్రకటించలేదని ఆయన విమర్శించారు.

తెలంగాణ ప్రజాప్రతినిధులు రాజీనామాలకు కట్టుబడి ఉండాలని ఆయన అభిప్రాయపడ్డారు. రాజీనామాలు చేసినవారు విధులకు హాజరు కావడం ఉద్యమ స్ఫూర్తి ఎలా అవుతుందని ఆయన ప్రశ్నించారు. సకల జనుల సమ్మెకు తెలంగాణ రాజకీయ నాయకులంతా సహకరించాలని ఆయన కోరారు. జయశంకర్ జయంతి ఆగస్టు 6వ తేదీన సభలూ సమావేశాలు నిర్వహించనున్నట్లు ఆయన తెలిపారు. జయశంకర్ జయంతి రోజు ఆయన గ్రామం అక్కంపేట నుంచి హన్మకొండ వరకు బైక్ ర్యాలీ నిర్వహించాలని తెలంగాణ విద్యావంతుల వేదిక నిర్ణయించింది.

English summary

Telangana political JAC chairman Kodandaram targeted TDP president N Chandrababu Naidu on Telangana issue.