చస్తానంటే కెసిఆర్‌ను చావనివ్వం: జెసి దివాకర్ రెడ్డి

By Srinivas

Published: Monday, August 1, 2011, 15:42 [IST]

హైదరాబాద్: తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు చస్తానంటే తాము ఒప్పుకోమని అనంతపురం జిల్లా కాంగ్రెసు పార్టీ సీనియర్ శాసనసభ్యుడు జెసి దివాకర్ రెడ్డి సోమవారం అన్నారు. కెసిఆర్ చస్తే తెలంగాణ వస్తుందా అని అన్నారు. కెసిఆర్ బాగుండాలనేదే తమ ఆకాంక్ష అన్నారు. కెసిఆర్ ప్రాణాలు చాలా విలువైనవన్నారు. ఆయన విషం తాగాల్సిన అవసరం లేదన్నారు. సమస్యను సామరస్యంగా పరిష్కరించుకోవాలని సూచించారు. తెలంగాణ ఐక్య కార్యాచరణ సమితి చైర్మన్ కోదండరామ్, సమైక్యాంధ్ర ఐక్య కార్యాచరణ సమితి చైర్మన్ శ్యామూల్‌లను వెంటనే ఉద్యోగం నుండి తొలగించాలని ఆయన డిమాండ్ చేశారు. ప్రజాప్రతినిధులను రాజీనామా చేయమని డిమాండ్ చేసే హక్కు ఆయనకు ఎక్కడిదని ప్రశ్నించారు.

కోదండరామ్ ముందు తన ప్రభుత్వ ఉద్యోగానికి రాజీనామా చేయాలని డిమాండ్ చేశారు. ప్రభుత్వ జీతం తీసుకుంటూ ప్రభుత్వానికి వ్యతిరేకంగా కోదండరామ్ పని చేస్తున్నారని ఆయనపై వెంటనే ముఖ్యమంత్రి చర్య తీసుకోవాలని అన్నారు. తాను రాయల తెలంగాణ ఏర్పాటుకు కట్టుబడి ఉన్నానని చెప్పారు. మంత్రివర్గ భేటీ జరగనంత మాత్రాన ఎలాంటి నష్టం లేదని ఆయన అభిప్రాయపడ్డారు. అన్ని శాఖలు బాగానే పని చేస్తున్నాయన్నారు. రాష్ట్రంలో ఎలాంటి అనిశ్చితి లేదన్నారు. పాలన సజావుగానే సాగుతుందన్నారు. కొందరు మంత్రులు కార్యాలయాలకు రాకున్నా కొన్ని ఫైళ్లపై సంతకాలు చేస్తున్నారన్నారు. మంత్రులు హాజరు కాక పోయినా ముఖ్యమంత్రి కిరణ్ కుమార్ రెడ్డి ఒక్కరే పరిపాలన సాగించగలరని అన్నారు.

Published On August 1, 2011