అది నా హక్కు: జెసి దివాకర్‌కి కోదండరామ్ చురక

హైదరాబాద్: తాను ప్రభుత్వ ఉద్యోగం వదిలి పెట్టడం పెద్ద విషయం కాదని, అది చాలా ఈజీ అని అయితే అది తన వ్యక్తి గతమని తెలంగాణ ఐక్య కార్యాచరణ సమితి చైర్మన్ ప్రొఫెసర్ కోదండరామ్ మంగళవారం కాంగ్రెసు పార్టీ సీనియర్ ఎమ్మెల్యే, మాజీ మంత్రి జెసి దివాకర్ రెడ్డి చేసిన వ్యాఖ్యలకు సమాధానంగా చెప్పారు. తెలంగాణ జెఏసి స్టీరింగ్ కమిటీ సమావేశం అనంతరం ఆయన మీడియాతో మాట్లాడారు. ప్రభుత్వ ఉద్యోగి రాజకీయాల్లో పాల్గొనడం రాజ్యాంగం ఇచ్చిన హక్కు అని అన్నారు. ఉద్యోగం తన వ్యక్తిగతం అన్నారు. కేంద్ర ప్రభుత్వానికి 14ఎఫ్ పై నిబద్దత లేదని కేంద్ర మంత్రి చిదంబరం ప్రకటనతో తేటతెల్లమయిందని అన్నారు. 14ఎఫ్ తొలగించకుండా ఎస్సై పరీక్షలు నిర్వహిస్తే ఊరుకునేది లేదని హెచ్చరించారు. హైదరాబాదును ఫ్రీజోన్ చేయాలనే కుట్ర జరుగుతుందన్నారు.

ఈ నెల 5న అన్ని సంఘాలతో రౌండ్ టేబుల్ సమావేశం ఉంటుందని అన్నారు. హైదరాబాదులో సమావేశం ఉంటుందన్నారు. తెలంగాణ ప్రాంత ప్రజాప్రతినిధులు అందరూ 6వ తేదిలోగా రాజీనామాలు చేయాలని సూచించారు. ఈ నెల 8వ తేది నుండి సకల జనుల సమ్మె ప్రారంభమవుతుందని చెప్పారు. దశల వారీగా ఉద్యమం ఉంటుందని చెప్పారు. తెలంగాణ కోసం ధర్నాలు, రాస్తారోకోలతో పాలన స్తంభిస్తామని చెప్పారు. 17 వరకు సకల జన సమ్మె ఉధృతమవుతుందన్నారు. 17 నుండి ఉద్యోగ సంఘాలతో పాటు న్యాయవాదులు సైతం కోర్టులను బహిష్కరిస్తారని చెప్పారు. సకల జన సమ్మెలో అందరూ పాల్గొనాలని కోదండరామ్ పిలుపునిచ్చారు.

English summary

Telangana political jac chairman Kodandaram answered to Congress senior mla JC Diwakar Reddy. He said today that his job his personal.