చర్చలకు రావడానికి వీలు కాదు: తెలంగాణ ఉద్యోగులు

By Srinivas

Published: Thursday, August 11, 2011, 10:54 [IST]

హైదరాబాద్: ప్రభుత్వంతో చర్చలకు వెళ్లడానికి తమకు వీలు కావడం లేదని తెలంగాణ ఉద్యోగ ఐక్య కార్యాచరణ సమితి గురువారం ప్రకటించింది. టిఎన్జీవో భవనంలో తెలంగాణ ఉద్యోగ సంఘాలు భేటీ అయి ప్రభుత్వంతో చర్చలకు వెళ్లడంపై చర్చించాయి. అనంతరం టిఎన్జీవో నేతలు స్వామి గౌడ్, దేవిప్రసాద్ తదితరులు మాట్లాడారు.చర్చలకు ఆహ్వానించి కేవలం ఇరవై నిమిషాలే కేటాయించడం సరికాదన్నారు. 20 నిమిషాలలో ఫలితం ఎలా తేలుస్తారని ప్రశ్నించారు. చర్చలకు పిలిచినప్పుడు ప్రభుత్వం కనీస మర్యాద పాటించలేదని ఆరోపించారు. చర్చల పేరుతో బెదిరింపులకు ప్రభుత్వం పాల్పడుతోందన్నారు. సకల జనుల సమ్మెలో ఉద్యోగ సంఘాలు పాల్గొంటాయని చెప్పారు.

ఉద్యోగ సంఘాలపై తుపాకి ఎక్కుపెట్టి చర్చలకు రమ్మంటే ఎలా అని ప్రశ్నించారు. పోలీసులు ఉద్యోగుల ఇళ్లలోకి వెళ్లి బెదిరింపులకు గురి చేస్తున్నారని అన్నారు. ఉద్యోగుల ఫోన్లు ట్యాపింగు చేస్తున్నారని ఆరోపించారు. సమ్మె వాయిదా వేయాలని ప్రభుత్వం కోరుతుందని దానిపై చర్చించి నిర్ణయం తీసుకుంటామని చెప్పారు. ఉద్యోగుల సమ్మెను విరమింపచేయడానికి ప్రభుత్వానికి చిత్తశుద్ధి లేదన్నారు. ఎపిఎన్జీవోతో తెగతెంపులు చేసుకుంటున్నట్టు చెప్పారు. సమైక్య తీర్మానం చేసినందునే వారితో కలవవద్దని నిర్ణయం తీసుకున్నట్టు చెప్పారు. భవిష్యత్తులో ఎపిఎన్జీవో నిర్వహించే ఏ సభలకు వెళ్లమని అన్నారు.

Published On August 11, 2011