సంక్షేమం, అభివృద్ధే ధ్యేయం: స్వాతంత్ర్య వేడుకల్లో సిఎం

హైదరాబాద్: రాష్ట్ర అభివృద్ధి, ప్రజా సంక్షేమం కోసం ప్రభుత్వం చిత్తశుద్ధితో పని చేస్తుందని ముఖ్యమంత్రి నల్లారి కిరణ్ కుమార్ రెడ్డి సోమవారం అన్నారు. ఆగస్టు 15 స్వాతంత్ర్య దినోత్సవం సందర్భంగా పరేడ్ గ్రౌండ్సులో ఆయన జాతీయ జెండాను ఆవిష్కరించారు. పోలీసుల సైనిక వందనం స్వీకరించారు. వివిధ ప్రభుత్వ శాఖలు ఏర్పాటు చేసిన శకటాలను తిలకించారు. అనంతరం ఆయన మాట్లాడారు. యువతకు పదిహేను లక్షల ఉపాధి అవకాశాలను కల్పించేందుకు కృషి చేస్తున్నామని అన్నారు. అవినీతిరహిత పాలనకు ప్రభుత్వం తీవ్రంగా కృషి చేస్తుందన్నారు. ప్రాజెక్టు నిర్వాసితులకు అదనంగా ఇందిరమ్మ ఇళ్లు ఇస్తున్నామని అన్నారు. రైతులను ఆదుకోవడానికి అన్ని విధాలా చర్యలు తీసుకుంటున్నట్లు చెప్పారు.

కరవు, వరదల వల్ల నష్టపోయిన రైతులకు ఇన్ పుట్ సబ్సిడీలు ఇస్తున్నట్లు చెప్పారు. ప్రాణహిత - చేవెళ్ల, పోలవరం ప్రాజెక్టుల జాతీయ హోదా కోసం కృషి చేస్తున్నామని అన్నారు. మహిళలను ఆర్థికంగా ఎదిగేందుకు వెయ్యి కోట్ల రూపాయలతో మహిళా ఆర్థిక సంస్థను ఏర్పాటు చేస్తున్నట్టు చెప్పారు. ప్రతి ఒక్కరు చదువుకోవాలనే ఉద్దేశ్యంతో ఆర్థిక స్థోమత లేని వారి కోసం ఫీజు రీయింబర్సుమెంట్సు ఇస్తున్నట్లు చెప్పారు. ఔటర్ రింగురోడ్డు, మెట్రో రైలు, శంషాబాదు ఎయిర్ పోర్టు, పాత బస్తీ అభివృద్ధి, పారిశ్రామిక అభివృద్ధి, రాష్ట్ర అభివృద్ధి, సంక్షేమ కార్యక్రమాలు తదితరాలను ముఖ్యమంత్రి వివరించారు.

English summary

CM Kiran Kumar Reddy hausted flag at parade grounds today. After that he addressed state people.