తెలంగాణపై కిరణ్‌ కుమార్‌కు జానా రెడ్డి చిట్కాలు

హైదరాబాద్: తెలంగాణ ఉద్యమం కారణంగా ఎదురవుతున్న ఇబ్బందులను అధిగమించడానికి ముఖ్యమంత్రి కిరణ్ కుమార్ రెడ్డికి తెలంగాణకు చెందిన పంచాయతీరాజ్ మంత్రి కె. జానా రెడ్డి చిట్కాలు చెబుతున్నట్లు ప్రచారం జరుగుతోంది. తెలంగాణ కోసం ఓ వైపు పోరాటం చేస్తూనే దానికి విరుగుడుగా ఏం చేయాలో జానారెడ్డే స్వయంగా కిరణ్ కుమార్ రెడ్డికి సలహా ఇస్తున్నట్లు చెబుతున్నారు. మంత్రి వర్గ సమావేశం విషయంలో కిరణ్ కుమార్ రెడ్డికి సలహా ఇచ్చింది జానారెడ్డేనని చెబుతున్నారు. సచివాలయానికి రావడానికి తెలంగాణ మంత్రులు విముఖత ప్రదర్శించడంతో క్యాంపు కార్యాలయంలో ఏర్పాటు చేస్తే సరి జానా రెడ్డి చెప్పారని అంటున్నారు.

ముఖ్యమంత్రి కిరణ్ కుమార్ రెడ్డి క్యాంపు కార్యాలయంలో ఏర్పాటు చేసిన మంత్రివర్గ సమావేశానికి తెలంగాణకు చెందిన కోమటిరెడ్డి వెంకటరెడ్డి, శంకరరావు మినహా మిగతా మంత్రులంతా హాజరయ్యారు. కోమటిరెడ్డి వెంకటరెడ్డి కచ్చితమైన వైఖరితోనే మంత్రి వర్గ సమావేశాన్ని బహిష్కరించారు. శంకరరావు మాత్రం తన కంటికి శస్త్రచికిత్స జరిగినందున రాలేకపోతున్నట్లు ముఖ్యమంత్రికి చెప్పారు. మంత్రి వర్గ సమావేశం నిర్ణయాలను తెలంగాణకు చెంది సమాచార, పౌర సంబంధాల మంత్రి డికె అరుణ మీడియాకు వివరించారు. ఆ రకంగా జానా చిట్కా పని చేసిందని అంటున్నారు. జానా రెడ్డి తీరును తెలంగాణ రాష్ట్ర సమితి (తెరాస) శానససభా పక్ష నాయకుడు ఈటెల రాజేందర్ తప్పు పట్టారు.

English summary

It is said that minister from Telangana K Jana Reddy is advising CM Kiran Kumar Reddy on Telangana issue.