ప్రజాక్షేత్రంలోకి చంద్రబాబు సతీమణి భువనేశ్వరి

By Srinivas

Published: Friday, August 19, 2011, 9:13 [IST]

హైదరాబాద్: తెలుగుదేశం పార్టీ అధినేత నారా చంద్రబాబు నాయుడు సతీమణి నారా భువనేశ్వరి మొట్టమొదటిసారి ప్రజల మధ్యకు రానున్నట్లు వార్తలు వచ్చాయి. భువనేశ్వరి ఇప్పటి వరకు ఎప్పుడూ ప్రజాక్షేత్రంలోకి రాలేదు. తన తండ్రి ఎన్టీఆర్ హయాంలో అయినా, తన భర్త చంద్రబాబు తొమ్మిదిన్నర సంవత్సరాలు ముఖ్యమంత్రిగా పని చేసిన సమయంలో గానీ భువనేశ్వరి ఏనాడు ప్రజాక్షేత్రంలోకి రాలేదు. ఆమె ఎప్పుడూ రాజకీయ కార్యక్రమాల్లో పాల్గొన్న సందర్భాలు లేవు. ఇటీవల చంద్రబాబు రైతుల కోసం దీక్ష చేస్తున్న సమయంలో కేవలం పరామర్శించడానికి మాత్రమే వచ్చారు. అయితే మొదటిసారి ఈ నెల 21వ తేదిన ఆమె ప్రజల మధ్యకు రానుంది. అవినీతిపై అలుపెరగని పోరాటం చేస్తున్న ప్రముఖ సంఘ సంస్కర్త అన్నాహజారేకు మద్దతుగా ఈ నెల 21న తేదిన జరిగే కార్యక్రమంలో పాల్గొననున్నారని తెలుస్తోంది.

చంద్రబాబు రాజకీయాలు చూసుకుంటున్న సమయంలో ఆమె హెరిటేజ్ కార్యకలాపాలు చూసుకునే వారు. అందుకోసం అప్పుడప్పుడు హెరిటేజ్ కార్యాలయానికి వచ్చే వారు. అయితే ఇటీవల లోకేష్ కుమార్ హెరిటేజ్ పగ్గాలు చేపట్టిన తర్వాత ఆ రాక కూడా తగ్గింది. ఎన్టీఆర్ కూతుళ్లలో ఇప్పటి వరకు కేవలం పురంధేశ్వరి మాత్రమే పూర్తి రాజకీయాల్లో ఉన్నారు. చంద్రబాబు నాయుడు కుటుంబ సభ్యులు ఇటీవల తరుచూ రాజకీయ కార్యక్రమాలలో పాల్గొంటున్నారు. ఇటీవల బాబు తనయుడు లోకేష్ కుమార్ పలు రాజకీయ కార్యక్రమాల్లో పాల్గొనడం ఎన్టీఆర్ కుటుంబంలో చర్చానీయాంశంగా మారిన విషయం తెలిసిందే.

Published On August 19, 2011