మా ప్రధాన ప్రత్యర్థి టిఆర్ఎస్: జగన్ వర్గం కొండా సురేఖ

By Srinivas

Published: Monday, August 22, 2011, 11:20 [IST]

హైదరాబాద్: రాష్ట్రంలో కాంగ్రెసు, తెలుగుదేశం పార్టీలు పూర్తిగా నిర్వీర్యం అయిన నేపథ్యంలో తెలంగాణ ప్రాంతంలో వైయస్సార్సీ పార్టీకి తెలంగాణ రాష్ట్ర సమితి పార్టీ ఒక్కటే ప్రధాన ప్రత్యర్థిగా ఉంటుందని, సీమాంధ్రలో ఏ పార్టీ ఉండదని వైయస్సార్సీ పార్టీ అధినేత వైయస్ జగన్మోహన్ రెడ్డి వర్గం కాంగ్రెసు శాసనసభ్యురాలు కొండా సురేఖ సోమవారం అన్నారు. జగన్ వర్గం ఎమ్మెల్యేలు రాజీనామాలు ఇవ్వడానికి వెళుతున్న సందర్భంగా పంజాగుట్ట చౌరస్తాలోని దివంగత వైయస్ విగ్రహానికి నివాళులు అర్పించారు. ఈ సందర్భంగా ఆమె మీడియాతో మాట్లాడారు.

తాను ప్రస్తుతం పదవికి రాజీనామా చేయడం లేదని తెలంగాణ బిడ్డగా మొదట తెలంగాణ కోసం చేసిన రాజీనామాకే కట్టుబడి ఉన్నానని కొండా సురేఖ చెప్పారు. వైయస్‌పై కుట్ర చేస్తున్నందుకు నిరసనగా తాను కాంగ్రెసు పార్టీ సభ్యత్వానికి రాజీనామా చేస్తున్నానని చెప్పారు. రాష్ట్రంలో అధికార కాంగ్రెసుతో తెలుగుదేశం కుమ్మక్కైందని అందుకే వారికి ప్రభుత్వం పడిపోదనే విశ్వాసం ఉందన్నారు. రాజీనామాలు ఆమోదింప చేసుకోవడానికి లీగల్‌లా వెళతామని అన్నారు. పిసిసి చీఫ్ బొత్స సత్యనారాయణ మాటలు చూస్తుంటే కాంగ్రెసు నేతలు ఒత్తిడిలో ఉన్నట్టు కనిపిస్తోందన్నారు.

మమ్మల్ని ఎవరూ మభ్య పెట్టడం లేదన్నారు. కాంగ్రెసు పార్టీయే ఎమ్మెల్యేలు చేజారకుండా ఉండటానికి కష్టపడుతుందన్నారు. తెలంగాణపై పార్టీ ముసాయిదాలో ఎక్కడా వ్యతిరేకత లేదన్నారు. జగన్ తెలంగాణలో అడుగు పెట్టాక పార్టీ తప్పకుండా పుంజుకుంటుందని అన్నారు. రాజీనామాలు ఆమోదించకపోతే గవర్నర్‌ను కలుస్తామని అన్నారు. గవర్నర్‌ను కలవడం అంటే పార్టీకి మద్దతు ఉపసంహరించుకున్నట్లే అని చెప్పారు.

Published On August 22, 2011