కాంగ్రెసు పార్టీ అధిష్టానంపై తిరుగుబాటు దిశగా రాయపాటి

By Pratap

Published: Friday, August 26, 2011, 8:44 [IST]

హైదరాబాద్: పార్టీ అధిష్టానంపై కాంగ్రెసు పార్టీ గుంటూరు పార్లమెంటు సభ్యుడు రాయపాటి సాంబశివ రావు గుర్రుగా ఉన్నారు. తిరుమల తిరుపతి దేవస్థానం (టిటిడి) పాలక మండలి చైర్మన్ పదవిని ఆశించి భంగపడిన ఆయన తిరుగుబాటుకు సిద్ధమవుతున్నట్లు వార్తలు వస్తున్నాయి. ఆ పదవి కోసం ఆయన చాలా కాలంగా ప్రయత్నాలు చేస్తున్నారు. అయితే, టిటిడి చైర్మన్‌గా ప్రభుత్వం నరసాపురం పార్లమెంటు సభ్యుడు కనుమూరి బాపిరాజును నియమించింది.

పార్టీకి తమ అవసరం లేదని భావిస్తున్నామని, గుంటూరు వచ్చి కార్యకర్తలతో సమావేశమై భవిష్యత్తు నిర్ణయం తీసుకుంటానని ఢిల్లీలో ఉన్న ఆయన ఓ ప్రముఖ తెలుగు దినపత్రిక ప్రతినిధితో అన్నారు. గుంటూరు జిల్లాలో పార్టీకి కష్టకాలంలో తాను, తన సోదరుడు శ్రీనివాస్ అండగా నిలిచామని, అయినా గుర్తింపు లభించలేదని ఆయన అన్నారు. గుర్తింపు లభించనప్పుడు పార్టీలో కొనసాగడం ఎంత వరకు భావ్యమని, త్వరలో నిర్ణయం తీసుకుంటానని ఆయన చెప్పారు.

Published On August 26, 2011