సంప్రదాయం మంటగలుపుతున్నాడు: కెసిఆర్‌పై రేణుక

By Srinivas

Published: Friday, August 26, 2011, 16:16 [IST]

ఖమ్మం: తెలంగాణ రాష్ట్ర సమితి అధ్యక్షుడు, మహబూబ్ నగర్ పార్లమెంటు సభ్యుడు కల్వకుంట్ల చంద్రశేఖర రావు తీరు తెలంగాణ సంప్రదాయాలు, సంస్కృతులు మంటగలిపేలా ఉన్నాయని మాజీ కేంద్ర మంత్రి రేణుకా చౌదరి శుక్రవారం ఖమ్మం జిల్లాలో విమర్శించారు. కెసిఆర్ మాట్లాడే అసభ్య పదాలు తెలంగాణ విధానం కాదన్నారు. నరుకుతాను, కొరుకుతాను వంటి పదాలు సరికాదన్నారు. తొడగొడితే తెలంగాణ రాదన్నారు. సంప్రదింపుల ద్వారా తెలంగాణ సాధించుకోవాలని సూచించారు.

వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి వ్యవహారం కోర్టు ద్వారా నడుస్తోందన్నారు. సిబిఐ దర్యాఫ్తులో పార్టీకి సంబంధం లేదన్నారు. కాగా తన తనయుడికి, జగన్‌తో స్నేహం ఉన్నందు వల్లే తాను కొన్నిరోజులు ఏమీ మాట్లాడలేదని మంత్రి శంకర్ రావు హైదరాబాదులో చెప్పారు. మాజీ ముఖ్యమంత్రి రోశయ్యకు గవర్నర్ పదవి రావడం సంతోషమన్నారు. చిత్తశుద్ధితో పని చేస్తే ఫలితం ఉంటుందనే దానికి రోశయ్య మంచి ఉదాహణ అన్నారు.

Published On August 26, 2011