టిడిఎల్పీలోనే చంద్రబాబు దుమ్ము దులిపిన నాగం

By Pratap

Published: Monday, August 29, 2011, 19:10 [IST]

హైదరాబాద్: చాలా రోజుల తర్వాత తెలుగుదేశం నుంచి సస్పెండ్ అయిన శాసనసభ్యుడు నాగం జనార్దన్ రెడ్డి తెలుగుదేశం శాసనసభా పక్షం (టిడిఎల్‌పి) మెట్లు ఎక్కారు. టిడిఎల్పీ కార్యాలయంలోనే మీడియా సమావేశం ఏర్పాటు చేసి తెలుగుదేశం పార్టీ అధ్యక్షుడు నారా చంద్రబాబునాయుడిపై విమర్సలు చేశారు. టిడిపి తెలంగాణ ఫోరంపై విరుచుకుపడ్డారు. సమావేశాలు లేనప్పుడు శాసనసభ ఆవరణలో స్పీకర్ నాదెండ్ల మనోహర్ మీడియా పాయింట్‌ను ఎత్తేయడంతో మీడియా సమావేశం ఏర్పాటు చేయడానికి నేరుగా ఆయన టిడిఎల్పీ కార్యాలయంలో అడుగు పెట్టారు. తమ రాజీనామాలను ఆమోదించాలని కోరడానికి తన జట్టుతో కలిసి ఆయన సోమవారం సాయంత్రం స్పీకర్ నాదెండ్ల మనోహర్‌ను కలిశారు. ఆ తర్వాత మీడియాతో మాట్లాడారు.

టిడిఎల్పీ మెట్లు ఎక్కవద్దని అనుకున్నామని, స్పీకర్ పుణ్యమా అని ఎక్కాల్సి వచ్చిందని, మీడియా పాయింట్ ఎత్తేయడంతో ఎక్కడ మాట్లాడాలని స్పీకర్‌ను అడిగామని, టిడిఎల్పీని వాడుకోవాలని స్పీకర్ సూచించారని నాగం జనార్దన్ రెడ్డి చెప్పారు. తెలంగాణకు ద్రోహం చేసే చంద్రబాబు మార్గదర్శకత్వంలో తెలుగుదేశం తెలంగాణ నేతలు ఎలా న్యాయం చేస్తారని ఆయన అడిగారు. తెలుగుదేశం తెలంగాణ ఫోరం ఎజెండాను ఖరారు చేస్తుందా, అది కాంగ్రెసు అనుబంధ సంస్థగా మారిందా అని ఆయన అడిగారు. ఆత్మాభిమానం లేకపోవడం వల్లనే పార్టీ తెలంగాణ నేతలు చంద్రబాబు చుట్టూ తిరుగుతున్నారని ఆయన విమర్శించారు. తెలుగుదేశం పార్టీ కార్యాలయం ఎన్టీఆర్ ట్రస్టు భవన్ ఆంధ్రా భవన్‌గా మారిందని ఆయన అన్నారు. తమ రాజీనామాలను ఆమోదిస్తానని నాదెండ్ల మనోహర్ చెప్పారని, స్పీకర్ నిర్ణయం కోసం వేచి చూస్తామని ఆయన అన్నారు.

Published On August 29, 2011