వైయస్ జగన్ ఎమ్మెల్యేలను వెనక్కి రమ్మనట్లేదు: బొత్స

By Srinivas

Published: Tuesday, August 30, 2011, 9:53 [IST]

రాజమండ్రి: రాజీనామాలు చేసిన వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి వర్గం శాసనసభ్యులను తాము వెనక్కి రమ్మనడం లేదని ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ మంగళవారం తూర్పు గోదావరి జిల్లాలో స్పష్టం చేశారు. కాంగ్రెసు, ప్రజారాజ్యం పార్టీ కార్యకర్తల మధ్య సమన్వయ లోపం ఉన్న మాట వాస్తవమేనని చెప్పారు. అయితే దానిని పూడ్చడానికి త్వరలో కార్యకర్తల విస్తృతస్థాయి సమావేశం ఏర్పాటు చేస్తామని చెప్పారు. జిల్లా కాంగ్రెసు కమిటీలను, ప్రదేశ్ కాంగ్రెసు కమిటీలని త్వరలో పునర్వవ్యవస్థీకరిస్తామని చెప్పారు. ఇందులో భాగంగానే అడ్‌హక్ కమిటీల ఏర్పాటు ఉంటుందని స్పష్టం చేశారు.

తమిళనాడు గవర్నర్‌గా నియమితుడైన మాజీ ముఖ్యమంత్రి కొణిజేటి రోశయ్య ప్రమాణ స్వీకారోత్సవ కార్యక్రమానికి బుధవారం హాజరవుతానని చెప్పారు. కాగా బొత్స సత్యనారాయణ రాజమండ్రి నుండి న్యూఢిల్లీ బయలుదేరి వెళ్లారు. దివంగత ముఖ్యమంత్రి వైయస్ రాజశేఖర రెడ్డిపై ఆయన ఆత్మబంధువు కెవిపి రామచంద్రా రావు రూపొందించిన వైయస్సార్-మ్యాన్ ఆఫ్ ది పీపుల్ ఛాయా చిత్ర పుస్తక ఆవిష్కరణలో పాల్గొంటారు.

Published On August 30, 2011