కాంగ్రెసులో మళ్లీ తెరపైకి కెవిపి రామచంద్ర రావు

హైదరాబాద్: దివంగత ముఖ్యమంత్రి వైయస్ రాజశేఖర రెడ్డి ఆత్మబంధువు కెవిపి రామచంద్ర రావు చాలా రోజుల తర్వాత మళ్లీ తెరపైకి నెమ్మదిగా దూసుకు వస్తున్నట్లుగా కనిపిస్తోంది. 2009 సెప్టెంబర్ 2వ తేదిన వైయస్ దుర్మరణం అనంతరం ముఖ్యమంత్రిగా బాధ్యతలు చేపట్టిన కొణిజేటి రోశయ్య హయాంలో పని చేసినప్పటికీ ఆ తర్వాత క్రమంగా ప్రధాన రాజకీయాల్లో ఆయన ప్రభావం పూర్తిగా తగ్గిపోయింది. ఆ తర్వాత కొన్నాళ్లుగా కెవిపి దుబాయ్‌లో ఉంటున్న తన కుమారుడి వద్ద ఉన్నారని వార్తలు వచ్చాయి. కడప పార్లమెంటు సభ్యుడు వైయస్ జగన్మోహన్ రెడ్డి కాంగ్రెసు పార్టీని వీడి సొంత కుంపటి పెట్టుకోవడం, క్రమంగా కాంగ్రెసు నేతలను తన వైపుకు ఆకర్షిస్తూ రాష్ట్రంలో కాంగ్రెసు పార్టీకి, రాష్ట్ర ప్రభుత్వానికి సవాళ్లు విసురుతున్న సమయంలో కెవిపి అనూహ్యంగా తెరపైకి వస్తున్నారు.

ప్రస్తుత పరిస్థితుల్లో కాంగ్రెసుకు దివంగత వైయస్ ఆత్మబంధువుగా రాజకీయాలు బాగా తెలిసిన కెవిపి ఆవశ్యకతను గమనించిన పార్టీ అధిష్టానం ఆయనను ఆదేశించినా లేక తన రాజకీయ భవిష్యత్తు కోసం ఆయనే తెరపైకి వచ్చినా ఇప్పుడు ఆయన అవసరం కాంగ్రెసుకు ఉందనేది పలువురి వాదన. ఇలాంటి సమయంలో ఆయన తెరపైకి వచ్చారు. వైయస్ అసలైన వారసులం మేమే అని చెప్పుకుంటున్న జగన్ వర్గానికి ధీటుగా సమాధానం చెప్పాలంటే కెవిపియే సమర్థుడని పార్టీ సైతం భావిస్తోంది. వైయస్ సన్నిహితుల ద్వారానే వైయస్, జగన్ వేరు వేరు అనే విషయాన్ని ప్రజల్లోకి బాగా తీసుకు వెళ్లేందుకు కెవిపి లాంటి వారు ఉపయోగపడతారని పార్టీ భావిస్తున్నట్లుగా తెలుస్తోంది.

అందులో భాగంగానే కెవిపి రెండు రోజుల క్రితం వైయస్సార్ - ది మ్యాన్ ఆఫ్ ది పీపుల్ అనే పుస్తకాన్ని కాంగ్రెసు అతిరథుల మహారథుల ఆధ్వర్యంలో పుస్తకాన్ని ఆవిష్కరించినట్లుగా తెలుస్తోంది. ఆ తర్వాత కెవిపి నిత్యం ప్రజా జీవితంలో ఉంటూ వస్తున్నారు. జగన్‌ను ధీటుగా ఎదుర్కొంటూ కాంగ్రెసు పార్టీని కాపాడేందుకు కెవిపితో సహా వైయస్‌కు సన్నిహితులు అయిన రాజమండ్రి ఎంపీ ఉండవల్లి అరుణ్ కుమార్, విజయవాడ ఎంపీ లగడపాటి రాజగోపాల్, మంత్రి వట్టి వసంత్ కుమార్ తదితరులను రంగంలోకి దించుతున్నట్లుగా కనిపిస్తోంది. కెవిపి శుక్రవారం వైయస్ వర్ధంతి సందర్భంగా హైదరాబాదులో హల్ చల్ సృష్టించారు. ఆ తర్వాత విజయవాడలో జరిగే వైయస్ విగ్రహావిష్కరణ కార్యక్రమానికీ హాజరయ్యారు. ఆ కార్యక్రమంలో వైయస్ తన ప్రాణ స్నేహితుడి కోసం ఎవరి కాళ్లైనా పట్టుకుంటానని అన్నారన్న వ్యాఖ్యలను కూడా గుర్తు చేయడం కొసమెరుపు.

English summary

It seems, KVP Ramachandra Rao is re-entry in to direct politics after many days.