గాలి జనార్దన్ రెడ్డి అరెస్టు: వైయస్ జగన్‌కు దెబ్బ

By Pratap

Published: Monday, September 5, 2011, 9:03 [IST]

హైదరాబాద్‌: కర్ణాటక మాజీ మంత్రి గాలి జనార్దన్ రెడ్డి అరెస్టు వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డికి పెద్ద దెబ్బనే. జగన్ కుటుంబానికి తాను అత్యంత సన్నిహితుడినని గాలి జనార్దన్ రెడ్డి పలు మార్లు చెప్పడమే కాకుండా ఆ విషయాన్ని రుజువు చేసుకున్నారు కూడా. వైయస్ జగన్‌కు గాలి జనార్దన్ రెడ్డితో వ్యాపార లావాదేవీలు కూడా ఉన్నట్లు చెబుతారు. వైయస్ జగన్ పార్టీ వెనక గాలి జనార్దన్ రెడ్డి హస్తం ఉందనే వార్తలు కూడా ఉన్నాయి. ఓబుళాపురం మైనింగ్ కంపెనీ (ఒఎంసి) అక్రమాలు దివంగత నేత వైయస్ రాజశేఖర రెడ్డి హయాంలోనే మిన్నంటాయనే ఆరోపణలు కూడా ఉన్నాయి.

ఒఎంసి అక్రమాలపై తెలుగుదేశం పార్టీ నాయకులు నిరంతర పోరాటం సాగించారు. గాలి జనార్దన్ రెడ్డికి కడప జిల్లా బ్రాహ్మణి స్టీల్స్‌ కోసం భూమి కేటాయించి, దానికి వాడుకునేందుకు అనంతపురం జిల్లాలో ఒఎంసికి ఇనుప ఖనిజాల గనులను అప్పగించారు. అయితే, ఆ ఇనుప ఖనిజాన్ని కేవలం బ్రాహ్మణి స్టీల్ కోసమే వాడాల్సి ఉండగా, అది ప్రారంభం కాకపోవడంతో గాలి జనార్దన్ రెడ్డికి చెందన ఓఎంసీ ఇనుప ఖనిజాన్ని ఎగుమతి చేస్తూ వచ్చింది. ఒఎంసి అక్రమ తవ్వకాలకు పాల్పడిందనే ఆరోపణలు ఉన్నాయి. గనుల అక్రమాలపై సుప్రీంకోర్టు కూడా సీరియస్ అయింది. ఈ నేపథ్యంలో గాలి జనార్దన్ రెడ్డి అరెస్టు వైయస్ జగన్‌కు పెద్ద దెబ్బనే కానుంది.

Published On September 5, 2011