గాలి జనార్దన్ రెడ్డి అరెస్టు, హైదరాబాదుకు తరలింపు

By Pratap

Published: Monday, September 5, 2011, 8:33 [IST]

బళ్లారి‌: కర్ణాటక మాజీ మంత్రి గాలి జనార్దన్ రెడ్డిని కేంద్ర దర్యాప్తు సంస్థ (సిబిఐ) అధికారులు సోమవారం ఉదయం అరెస్టు చేశారు. అంతకు ముందు ఆయన నివాసంలో సిబిఐ అధికారులు సోదాలు నిర్వహించారు. డివి శ్రీనివాస రెడ్డిని కూడా అరెస్టు చేశారు. నేరపూరిత కుట్ర సెక్షన్లు, మోసం, అవినీతి నిరోధక చట్టం కేసుల కింద వారిని సిబిఐ అధికారులు అరెస్టు చేశారు. వారిద్దరిని హైదరాబాదుకు తరలిస్తున్నారు. వారిని సిబిఐ ప్రత్యేక కోర్టు ముందు హాజరు పరిచే అవకాశాలున్నాయి. డివి శ్రీనివాస రెడ్డి ఓబుళాపురం మైనింగ్ కంపెనీ (ఒఎంసి) డైరెక్టరుగా వ్యవహరిస్తున్నారు.

కర్ణాటకలో అక్రమ మైనింగ్ వ్యవహారంలో లోకాయుక్త కర్ణాటక మాజీ మంత్రులు గాలి జనార్దన్ రెడ్డి, గాలి కరుణాకర్ రెడ్డిలను తప్పు పట్టిన విషయం తెలిసిందే. మనీ లాండరింగ్ కింద రెడ్డి సోదరులపై విచారణ జరపడానికి తగిన ఆధారాలున్నాయని లోకాయక్త నివేదిక తెలిపిందని న్యాయనిపుణులు అంటున్నారు. ఇనుప ఖనిజాన్ని వారు స్మగ్లింగ్ చేశారని కూడా ఆరోపించింది.

Published On September 5, 2011