ఢిల్లీ పేలుడు: హుజీ ఇ - మెయిల్ గుర్తింపు

By Pratap

Published: Thursday, September 8, 2011, 10:14 [IST]

న్యూఢిల్లీ: ఢిల్లీలో బాంబు పేలుడుకు తామే పాల్పడ్డామంటూ హర్కత్ - ఉల్ - జిహాదీ ఇస్లామీ (హుజీ) ఎక్కడి నుంచి మెయిల్ పంపిందనే విషయానని దర్యాప్తు అధికారులు గుర్తించారు. జమ్మూ కాశ్మీర్‌లోని ఓ సైబర్ కేఫ్ నుంచి ఈ మెయిల్‌ను పంపినట్లు గుర్తించారు. బుధవారం ఢిల్లీలో జరిగిన బాంబు పేలుడులో 11 మంది మరణించగా, 75 మంది గాయపడిన విషయం తెలిసిందే. గ్లోబల్ సైబర్ కేఫ్ నుంచి ఇ - మెయిల్‌ను పంపినట్లు గుర్తించి, దాని యజమానిని గురువారం ఉదయం అదుపులోకి తీసుకున్నారు. మరో ముగ్గురు అనుమానితులను దర్యాప్తు అధికారులో అదుపులోకి తీసుకున్నట్లు తెలుస్తోంది.

సైబర్ కేఫ్ యజమాని ఖ్వాజా మెహమూద్ అజీజ్, అతని సోదరుడు ఖలీద్ అజీజ్‌లను జాతీయ దర్యాప్తు సంస్థ (ఎన్ఐఎ) అధికారులు ప్రశ్నించారు. పేలుడుకు వినియోగించిన కారు యజమానిని కూడా పోలీసులు గుర్తించారు. కారు పోయిందని తాను ఆరు నెలల క్రితమే పోలీసులకు ఫిర్యాదు చేసినట్లు అతను తెలిపాడు. ఇ - మెయిల్‌ను ట్రేస్ చేయడం వల్ల పేలుడుకు సంబంధించి కీలకమైన ఆధారాలు లభించగలవని భావిస్తున్నారు.

Published On September 8, 2011