ఆంధ్రజ్యోతిపై విరుచుకుపడి వైయస్ జగన్ సాక్షి డైలీ

By Pratap

Published: Monday, September 12, 2011, 10:02 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డికి చెందిన సాక్షి దినపత్రిక మరోసారి ఎబిఎన్ - ఆంధ్రజ్యోతి చానెల్‌పై మరోసారి విరుచుకుపడింది. కాంగ్రెసు, తెలుగుదేశం కుమ్మక్కు డ్రామా నుంచి దృష్టి మళ్లించేందుకు పచ్చ మీడియా పాట్లు పడుతోందంటూ ఆరోపించింది. కడుపుబ్బ నవ్విస్తున్న కామెడీ షో శీర్షిక కింద సాక్షి డైలీలో సోమవారం ఆ వార్తాకథనం ప్రచురితమైంది. కాంగ్రెసులోకి తిరిగి వెళ్లడం అసంభవమని వైయస్ జగన్ ప్రకటించినా పట్టించుకోకుండా ఎబిఎన్ - ఆంధ్రజ్యోతి చానెల్ కాంగ్రెసు వైపు జగన్ అడుగులు అంటూ వక్రీరించిందని విమర్శించింది. జగన్ ప్రమాణస్వీకారం చేసినప్పుడు బిజెపి సభ్యులు బల్లలు చరిస్తే బిజెపి గూటికి జగన్ అంటూ వార్తాకథనాన్ని ప్రసారం చేసిందని సాక్షి తప్పు పట్టింది.

రాష్ట్రంలోనూ జాతీయంగానూ దయనీయంగా ఉండి, స్కామ్‌లూ అంతర్గత కల్లోలంతో అప్రతిష్టపాలు అయిన కాంగ్రెసులోకి జగన్ ఎలా వెళ్తారని సాక్షి పత్రిక ప్రశ్నించింది. మునిగే కాంగ్రెసులోకి వెళ్తారన్న రాతలు చూసి ప్రజలు నవ్వుతున్నారంటూ వ్యాఖ్యానించింది. సిఎన్ఎన్ - ఐబియన్ చానెల్‌కు జగన్ పరిణతితో కూడా ప్రకటనలు ఇచ్చారని, అయినా పచ్చ మీడియా వక్రీకరణలకు పూనుకుంటోందని అభిప్రాయపడింది. జగన్ వైఖరి కొత్తదేమీ కాదని, కడప ఉప ఎన్నికల సమయంలోనే ఆ విషయం చెప్పారని గుర్తు చేసింది.

రాష్ట్ర ప్రయోజనాలకు ప్రాధాన్యం ఇస్తూ జాతీయ స్థాయిలో అవసరమైతే ములాయం సింగ్, మమతా బెనర్జీ, శరద్ పవార్ వంటివారితో కలిసి పనిచేయడానికి జగన్ సిద్ధంగా ఉంటారని చెప్పింది. వచ్చే ఎన్నికల్లో కాంగ్రెసు పార్టీ తుడిచిపెట్టుకు పోతుందని సర్వేలు చెబుతున్నాయని రాసింది.

Published On September 12, 2011