బాలయ్యను ఆహ్వానించడానికి సిద్ధంగా లేం: జైపాల్

By Srinivas

Published: Tuesday, September 13, 2011, 17:12 [IST]

హైదరాబాద్: బాలయ్య రాజకీయాల్లోకి వస్తానని ప్రకటించడంతో సీమాంధ్ర తెలుగుదేశం ప్రజా ప్రతినిధులు పోటీలు పడి మరి తమ నియోజకవర్గాలను అప్పగిస్తామని చెబితే తెలంగాణ నేతలు మాత్రం అందుకు భిన్నంగా స్పందించారు. తెలంగాణ ప్రాంత శాసనసభ్యులం ఇప్పటికిప్పుడు రాజీనామా చేసి హీరో నందమూరి బాలకృష్ణను ఆహ్వానించడానికి సిద్ధంగా లేమని తెలుగుదేశం పార్టీ శాసనసభ్యుడు జైపాల్ యాదవ్ మంగళవారం అన్నారు. అయినా బాలకృష్ణ ఇప్పటికిప్పుడే పోటీ చేస్తానని చెప్పలేదన్నారు. వచ్చే ఎన్నికల్లో పోటీ చేస్తానని స్పష్టంగా చెప్పారన్నారు.

ప్రస్తుతం బాలయ్య కోసం రాజీనామా పరిస్థితిలో లేమన్నారు. తమకు బాలయ్య కన్నా తెలంగాణే ముఖ్యమన్నారు. 2014 ఎన్నికల విషయంపై అప్పుడే మాట్లాడుతామని చెప్పారు. కాగా రైతుల సమస్యలపై ఏర్పాటు చేసిన మీడియా సమావేశంలో విలేకరులు మీరు రాజీనామా చేసి బాలయ్యను ఆహ్వానిస్తారా అన్న ప్రశ్నకు ఆయన పై విధంగా స్పందించారు. ప్రభుత్వం పంట విరామం ప్రకటించిన రైతులకు పదివేల రూపాయలు నష్టపరిహారంగా ఇవ్వాలన్నారు. పంట నష్టపోయి ఆత్మహత్య చేసుకున్న రైతుల కుటుంబానికి రూ.5 లక్షలు ఎక్స్‌గ్రేషియా ప్రకటించాలని డిమాండ్ చేశారు. మోహన్ కందా సిఫార్సులు అమలు చేయాలని ఆయన ప్రభుత్వాన్ని డిమాండ్ చేశారు.

Published On September 13, 2011