మరో ముగ్గురు జగన్ వర్గం ఎమ్మెల్యేలు వెనక్కి

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్ వర్గానికి చెందిన మరో ముగ్గురు శానససభ్యులు రాజీనామాల నుంచి వెనక్కి తగ్గుతున్నట్లు సమాచారం. తాము రాజీనామాలు చేయడం వల్ల రాజ్యాంగ సంక్షోభం ఏర్పడే స్థితి లేదని, ఉప ఎన్నికలను ఎదుర్కోవాల్సి వస్తుందని, వాటిని తాము ఎదుర్కోవడానికి సిద్ధంగా లేమని వారంటున్నారని తెలుస్తోంది. మూడేళ్లలో రెండు సార్లు పోటీ చేయడం తమ వల్ల కాదని వారు చెబుతున్నట్లు వార్తలు వస్తున్నాయి. ఉప ఎన్నికలతో పాటు 2014 సాధారణ ఎన్నికలను కూడా వారు ఎదుర్కోవాల్సి వస్తుంది.

కడప, తూర్పు గోదావరి, పశ్చిమ గోదావరి జిల్లాల నుంచి ఒక్కరేసి ఎమ్మెల్యే రాజీనామాల నుంచి వెనక్కి మళ్తున్నట్లు చెబుతున్నారు. ప్రస్తుత స్థితిలో తాము రాజీనామాలను ఆమోదింపజేసుకోవడానికి సిద్ధంగా లేమని వారంటున్నట్లు తెలుస్తోంది. తూర్పు గోదావరి జిల్లాకు చెందిన ఎమ్మెల్యే ఆ ప్రతిపాదనను ముందుకు తెచ్చారని అంటున్నారు. ఆ ఎమ్మెల్యేకు వైయస్ జగన్ ఒత్తిడి కారణంగానే 2009 ఎన్నికల్లో కాంగ్రెసు టికెట్ లభించింది. ఉప ఎన్నికలకు వెళ్లాలని జగన్ ఒత్తిడి పెంచితే మరింత మంది శాసనసభ్యులు వెనక్కి తగ్గవచ్చునని అంటున్నారు. కడప శాసనసభ్యుడు తాను ఏ పరిస్థితిలో రాజీనామా చేయాల్సి వచ్చిందనే విషయాన్ని స్పీకర్ నాదెండ్ల మనోహర్‌కు వివరించారని అంటున్నారు. ఈ వాదనతో రాజీనామాలను తిరస్కరించే అవకాశం స్పీకర్‌కు లభించిందని చెబుతున్నారు.

సిబిఐ ఎఫ్ఐఆర్‌లో చేర్చినందుకు నిరసనగా 26 మంది శాసనసభ్యులు రాజీనామాలు చేసిన వెంటనే జగన్ వర్గంలో విభేదాలు పొడసూపాయని అంటున్నారు. తమ రాజీనామాల వల్ల ముఖ్యమంత్రి కిరణ్ కుమార్ రెడ్డి ప్రభుత్వం కూలిపోయే స్థితి లేకపోవడంతో కొంత మంది తీవ్ర అసంతృప్తికి గురై, రాజీనామాలు సమర్పించినందుకు బాధపడ్డారని అంటున్నారు. ప్రభుత్వాన్ని కూల్చలేనప్పుడు రాజీనామాలు చేయడం అనవసరమని కూడా వాదించారని చెబుతారు.

English summary

There is no respite for Jaganmohan Reddy. Even as he faces the CBI probe in the disproportionate assets case, his loyalist MLAs who resigned from Congress and the state assembly have turned hostile to the idea of going for byelections.