తిరిగి పార్టీ పనిలో పడిన సోనియా, కార్యకర్తలకు దూరమే

By Pratap

Published: Thursday, September 15, 2011, 19:49 [IST]

న్యూఢిల్లీ: అమెరికాలో శస్త్రచికిత్స చేయించుకుని తిరిగి వచ్చిన కాంగ్రెసు అధ్యక్షురాలు సోనియా గాంధీ తిరిగి పనిలో పడ్డారు. అమెరికా నుంచి తిరిగి వచ్చిన తర్వాత ఆమె గురువారం తొలిసారి పార్టీ సమావేశంలో పాల్గొన్నారు. తన నివాసంలో జరిగిన సమావేశంలో గంటపాటు ఆమె పాల్గొన్నారు. ఉత్తరప్రదేశ్ ఎన్నికలపై తన నివాసంలో జరిగిన పార్టీ కేంద్ర ఎన్నికల కమిటీ సమావేశంలో ఆమె పాలు పంచుకున్నారు. ఈ సమావేశంలో పార్టీ ముఖ్య నాయకులు పలువురు పాల్గొన్నారు.

షాల్వార్ కమీజు ధరించి ఆమె సమావేశంలో దర్శనమిచ్చారు. సోనియా ఆరోగ్యంగానే ఉన్నారని, అయితే వైద్యుల సలహా మేరకు మరింత కాలం పూర్తి స్థాయి పార్టీ కార్యక్రమాలకు దూరంగా ఉంటారని ఎఐసిసి అధికార ప్రతినిధి జనార్దన్ ద్వివేది చెప్పారు. మునుపటి లాగే ఆమె ప్రధానిని ఆహ్వానించారని ఆయన చెప్పారు. సోనియా ఎప్పటిలాగే పనిలో పడడం ఆనందంగా ఉందని పార్టీ సీనియర్ నాయకుడు దిగ్విజయ్ సింగ్ చెప్పారు. సోనియా ఆరోగ్యం కుదుటపడిందని, ఆమె ఉత్సాహంగా కార్యక్రమాల్లో పాల్గొంటారని అంబికా సోనీ అన్నారు. ఈ నెల 8వ తేదీన ఢిల్లీ తిరిగి వచ్చిన తర్వాత పార్టీ సహచరులను సోనియా కలుసుకోవడం ఇదే తొలిసారి.

Published On September 15, 2011