గాలి మైనింగ్ కేసులో మరో ముగ్గురికి సిబిఐ నోటీసులు

By Pratap

Published: Monday, September 19, 2011, 18:47 [IST]

హైదరాబాద్: కర్ణాటక మాజీ మంత్రి గాలి జనార్దన్ రెడ్డి అక్రమ మైనింగ్ కేసులో సిబిఐ సోమవారం మరో ముగ్గురికి నోటీసులు జారీ చేసింది. రేపు మంగళవారం తమ ముందు హాజరు కావాలని వారిని సిబిఐ ఆదేశించింది. సండూరు మంజు, నాగరాజు, కారంపూడి మహేష్‌లకు సిబిఐ తాజాగా నోటీసులు జారీ చేసింది. గాలి జనార్దన్ రెడ్డి అక్రమ మైనింగ్ కేసులో సిబిఐ అధికారులు సోమవారం ఆ ముగ్గురి ఇళ్లలో సోదాలు నిర్వహించిన విషయం తెలిసిందే. వారి ఇళ్ల నుంచి సిబిఐ అధికారులు కీలకమైన పత్రాలను, నకిలీ పర్మిట్లను స్వాధీనం చేసుకున్నట్లు తెలుస్తోంది.

ఆ ముగ్గురి పేరు మీద గాలి జనార్దన్ రెడ్డి ఆర్థిక లావాదేవీలు నిర్వహించారని సిబిఐ అధికారులు అనుమానిస్తున్నట్లు సమాచారం. కాగా, గాలి జనార్దన్ రెడ్డిని, శ్రీనివాస రెడ్డిని మరో వారం రోజుల పాటు తమ కస్టడీకి కోరుతూ సిబిఐ కోర్టులో పిటిషన్ దాఖలు చేసింది. గాలి జనార్దన్ రెడ్డి కస్టడీలో ఉండడం వల్ల సాక్షుల్లో నమ్మకం పెరిగిందని, స్వచ్ఛందంగా వారు ముందుకు వస్తున్నారని సిబిఐ అంటోంది. గాలి జనార్దన్ రెడ్డి కంపెనీలు విదేశాల్లో కూడా ఉన్నాయని, వాటి వివరాలు రాబట్టాల్సి ఉందని చెబుతోంది. మొత్తం మీద, గాలి జనార్దన్ రెడ్డి అక్రమ మైనింగ్ కేసులో సిబిఐ దర్యాప్తును ముమ్మరం చేసింది. గాలి జనార్దన్ రెడ్డిని, శ్రీనివాస రెడ్డిని సిబిఐ అధికారులు సోమవారం నాంపల్లి కోర్టు ముందు హాజరు పరిచిన విషయం తెలిసిందే.

Published On September 19, 2011