రాపాయికే కిలో బియ్యం: ముఖ్యమంత్రి వెల్లడి

తిరుపతి: రాష్ట్రంలోని పేదలకు నవంబర్ 1వ తేదీ నుంచి రూపాయికే కిలో బియ్యం పంపిణీ చేయనున్నట్లు ముఖ్యమంత్రి కిరణ్ కుమార్ రెడ్డి ప్రకటించారు. తిరుపతిలో బుధవారం ఏర్పాటైన రైతు, మహిళా సదస్సులో ఆయన మాట్లాడారు. అర్హులైన పేదలందరికీ ఆ పథకాన్ని అమలు చేస్తామని ఆయన చెప్పారు. దానివల్ల 2 కోట్ల 25 లక్షల మందికి ప్రయోజనం చేకూరుతుందని ఆయన చెప్పారు. తన సొంత జిల్లా చిత్తూరుకు ఆయన వరాల వర్షం కురిపించారు.

కామధేను పథకం కింద చిత్తూరు జిల్లాలో పది వేల ఆవులను పంపిణీ చేస్తున్నట్లు ఆయన తెలిపారు. జిల్లాలో ప్రతి గ్రామానికీ మంచినీరు అందిస్తామని ఆయన హామీ ఇచ్చారు. ఇందుకు నాలుగు కోట్ల రూపాయలతో ఓ ప్రణాళికను రూపొందించినట్లు ఆయన తెలిపారు. నిరుద్యోగాన్ని నిర్మూలించడానికి రాజీవ్ యువకిరణాలు పథకాన్ని రూపొందించినట్లు ఆయన తెలిపారు. మహిళలకు రూ. 470 కోట్ల మేరకు పావలా వడ్డీ రుణాలు ఇవ్వడంతో పాటు ప్రతి మండలంలో స్త్రీనిధి బ్యాంకును ఏర్పాటు చేస్తామని ఆయన చెప్పారు. ఈ కార్యక్రమంలో తిరుపతి శాసనసభ్యుడు చిరంజీవి కూడా పాల్గొన్నారు. స్వయం సహాయక గ్రూపు మహిళలతో ఆయన మాట్లాడారు.

English summary

CM Kiran Kumar Reddy announced that Rs1 KG rice program will be implemented from November 1st.