రామోజీ భూములు స్వాధీనం: సాక్షి డైలీ కథనం

హైదరాబాద్: ఈనాడు అధిపతి రామోజీ రావు ఆధీనంలో ఉన్న శంషాబాద్ అంతర్జాతీయ విమానాశ్రయం సమీపంలోని పాలమాకుల వద్ద 5.10 ఎకరాల ప్రభుత్వ భూమిని రెవెన్యూ అధికారులు స్వాధీనం చేసుకున్నట్లు వైయస్సార్ కాంగ్రెసు పార్టీ అధ్యక్షుడు వైయస్ జగన్‌కు చెందిన సాక్షి దినపత్రిక రాసింది. ఎనిమిదేళ్ల క్రితం రామోజీ రావు బినామీల పేర ఇక్కడ భూములను సమకూర్చుకున్నారని ఆ పత్రిక రాసింది. రామోజీరావు కబ్జాను అధికారికంగా ధ్రువీకరించి, వాటిని రెవెన్యూ అధికారులు స్వాధీనం చేసుకున్నట్లు ఆ పత్రిక తెలిపింది.

రామోజీ రావు ఆక్రమించుకున్న భూములను స్వాధీనం చేసుకుని, దాని చుట్టూ ఉన్న కంచెను తొలగించి, హద్దు రాళ్లు పాతించారని ఆ పత్రిక రాసింది. రామోజీ ఆధీనంలో ఉన్న మొత్తం భూమిని సర్వే చేసి ప్రభుత్వ భూమి ఇంకా ఎంతుందో తేల్చాలని స్థానికులు కోరుతున్నట్లు ఆ పత్రిక రాసింది. ఈ భూముల గురించి గతంలో సాక్షి దినపత్రిక ఓ వార్తాకథనం ప్రచురించింది. అయితే, తన భూముల కొనుగోలు సక్రమంగానే జరిగిందని రామోజీ రావు ఈనాడు దినపత్రికలో వివరణ కూడా ఇచ్చారు.

English summary

According to Sakshi report - Revenue officers recovered land from Ramoji Rao at palamajula village.