మా కార్యాచరణ మాకే అర్థం కావట్లేదు: యాష్కీ

By Srinivas

Published: Monday, September 26, 2011, 14:43 [IST]

హైదరాబాద్: తెలంగాణపై మా కార్యాచరణ మాకే అర్థం కావడం లేదని నిజామాబాద్ పార్లమెంటు సభ్యుడు మధుయాష్కీ సోమవారం అన్నారు. సచివాలయంలో తెలంగాణ ఉద్యోగులు కళ్లకు నల్ల గుడ్డలు పట్టుకొని నిరసన తెలిపిన కార్యక్రమంలో ఎంపీలు మధుయాష్కీ, పొన్నం ప్రభాకర్, రాజయ్య తదితరులు పాల్గొన్నారు. ఈ సందర్భంగా యాష్కీ మాట్లాడారు. మంత్రి కోమటిరెడ్డి వెంకట్ రెడ్డిలా వ్యక్తిగత డెడ్ లైన్లతో ప్రయోజనం లేదన్నారు. కేంద్ర మంత్రి, రాష్ట్ర వ్యవహారాల ఇంచార్జ్ గులాం నబీ ఆజాద్ ఈ నెల 30లోగా నివేదిక ఇవ్వగానే కేంద్రం వెంటనే తెలంగాణపై నిర్ణయం తీసుకోవాలని సూచించారు. ఆచరణ సాధ్యం కాని అంశాలతో అధిష్టానం ప్రజలను మభ్య పెట్టవద్దన్నారు. తెలంగాణ కాంగ్రెసు నేతలను అవమానించే విధంగా పార్టీ తీరు ఉందన్నారు.

ఉద్యోగులకు ఎల్లప్పుడూ మా మద్దతు ఉంటుందన్నారు. ఉద్యోగులను తొలగిస్తే ప్రభుత్వ మనుగడ కష్టమన్నారు. ఉద్యోగులంతా సమ్మెలో స్వచ్చంధంగా పాల్గొనాలన్నారు. అణిచి వేయాలని చూస్తే ఉద్యమం అంతకు పదిరెట్లవుతుందన్నారు. ఐకాస చేసే ప్రతి కార్యక్రమానికి కాంగ్రెసు అండగా ఉంటుందన్నారు. సమ్మెలో పాల్గొన్న ఉద్యోగులపై చర్యలు తీసుకుంటే చూస్తూ ఊరుకోమని ఎంపీలు పొన్నం ప్రభాకర్, రాజయ్యలు అన్నారు. ముఖ్యమంత్రి కిరణ్ కుమార్ రెడ్డి రాష్ట్రంలోని వాస్తవ పరిస్థితులను కేంద్రానికి పంపాలన్నారు. అది ఆయన బాధ్యత అన్నారు.

Published On September 26, 2011