దమ్ముంటే రాజీనామాలు ఆమోదించండి: కొండా సురేఖ

By Srinivas

Published: Tuesday, October 4, 2011, 16:32 [IST]

హైదరాబాద్: దమ్ముంటే స్పీకర్ నాదెండ్ల మనోహర్ తమ రాజీనామాలు ఆమోదించాలని వైయస్సార్సీ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి వర్గం కాంగ్రెసు శాసనసభ్యురాలు కొండా సురేఖ మంగళవారం సవాల్ విసిరారు. తాము స్పీకర్ ఫార్మాట్‌లోనే రాజీనామాలు చేశామని అయినప్పటికీ ఇప్పటి వరకు రాజీనామాలు ఎందుకు ఆమోదించడం లేదని ప్రశ్నించారు. ప్రభుత్వం ఎక్కడ పడిపోతుందోనన్న భయంతోనే తమ రాజీనామాలు ఆమోదించడం లేదన్నారు. ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణకు జగన్‌ను విమర్శించే స్థాయి లేదన్నారు. తాము ఎట్టి పరిస్థితుల్లోనూ రాయల తెలంగాణ ఒప్పుకునే పరిస్థితి లేదన్నారు. హైదరాబాదు కేంద్రంగా గల తెలంగాణే తమకు కావాలన్నారు. కాంగ్రెసు, తెలుగుదేశం పార్టీలు కుమ్మక్కై రైతులను ఇబ్బందులకు గురి చేస్తున్నాయన్నారు. వచ్చే ఎన్నికల్లో ఎవరి సత్తా ఏమిటో తేల్చుకుందామన్నారు. జగన్ తెలంగాణకు ఎక్కడా వ్యతిరేకంగా మాట్లాడలేదన్నారు.

తాము పార్టీకి రాజీనామా చేసినప్పటికీ ఇప్పటి వరకు బొత్స ఆమోదించలేదని మరో శాసనసభ్యుడు గుర్నాథ్ రెడ్డి అన్నారు. తమ రాజీనామాలు ఆమోదిస్తే ప్రభుత్వం ఎక్కడ పడిపోతుందోనన్న భయం ఆయనను వెంటాడుతోందన్నారు. బొత్సకు దమ్ముంటే మొదట పార్టీకి తాము చేసిన రాజీనామాలు 24 గంటల్లో ఆమోదించాలన్నారు. ఆ తర్వాతే తమను ప్రశ్నించాలన్నారు. ఆయన వాస్తవాలు తెలుసుకోకుండా మాట్లాడుతున్నారని విమర్శించారు. జగన్‌ను విమర్శించడం విడ్డురంగా ఉందన్నారు. రైతులకు కేంద్ర ప్రభుత్వం ప్రకటించిన మద్దతు ధరనే రాష్ట్ర ప్రభుత్వం ప్రకటించిందని గట్టు రామచంద్రా రావు ముఖ్యమంత్రి కిరణ్ కుమార్ రెడ్డి సర్కారుపై ధ్వజమెత్తారు. రాష్ట్ర రైతాంగాన్ని ప్రభుత్వం వెంటనే ఆదుకోవాలని డిమాండ్ చేశారు.

Published On October 4, 2011