తెలంగాణపై వెంటనే తేల్చండి: రాహుల్‌తో చిరంజీవి

By Pratap

Published: Friday, October 7, 2011, 19:21 [IST]

న్యూఢిల్లీ: ఆంధ్రప్రదేశ్‌లో రాష్ట్రపతి పాలన విధించే ఆలోచన కేంద్రానికి లేదని చిరంజీవి చెప్పారు. యువత గురించి రాహుల్ గాంధీతో చర్చించినట్లు ఆయన తెలిపారు. తెలంగాణ సకల జనుల సమ్మె కూడా రాహుల్‌తో భేటీలో ప్రస్తావనకు వచ్చినట్లు ఆయన తెలిపారు. తెలంగాణపై త్వరిత గతిన నిర్ణయం తీసుకోవాలని చెప్పానని, ప్రజలు ఇబ్బంది పడుతున్నారని చెప్పానని ఆయన అన్నారు. ఏం నిర్ణయం తీసుకోవాలని రాహుల్ అడిగితే ఏదో ఒక నిర్ణయం త్వరితగతిన తీసుకోవాలని తాను సూచించినట్లు ఆయన తెలిపారు. ప్రధానంగా రైతు సమస్యలపై తాను మాట్లాడానని ఆయన అన్నారు. తెలంగాణపై చర్చలు జరుగుతున్నాయని, అందరూ సంయమనంతో వ్యవహరించాలని రాహుల్ గాంధీ చిరంజీవితో అన్నట్లు తెలుస్తోంది.

తిరుపతి శాసనసభ్యుడు, కాంగ్రెసు నాయకుడు చిరంజీవి శుక్రవారం రాహుల్ గాంధీని కలిశారు. తాను రాహుల్ గాంధీని మర్యాదపూర్వకంగానే కలిశానని చిరంజీవి భేటీ అనంతరం చెప్పారు. సోనియా గాంధీని కలుసుకోవడానికి చిరంజీవి ప్రయత్నాలు చేస్తున్నారు. అయితే, సోనియా గాంధీ ఆపాయింట్‌మెంట్ ఆయనకు లభించలేదు. తెలంగాణపై తాము మల్లగుల్లాలు పడుతున్న నేపథ్యంలో చిరంజీవిని కలిస్తే తెలంగాణ పార్టీ నేతలకు తప్పుడు సంకేతాలు వెళ్తాయనే ఉద్దేశంతో సోనియా చిరంజీవికి అపాయింట్‌మెంట్ ఇవ్వలేదని అంటున్నారు.

సోనియా గాంధీ శస్త్రచికిత్స కోసం అమెరికాలో ఉండడంతో చిరంజీవి అప్పట్లో రాహుల్ గాంధీ సమక్షంలోనే కాంగ్రెసు పార్టీలో చేరారు. అది కూడా హడావిడిగా జరిగిపోయింది. అమెరికా నుంచి తిరిగి రావడంతో సోనియాను మర్యాదపూర్వకంగా కలవాలని అనుకుంటున్నట్లు చిరంజీవి చెప్పారు. చిరంజీవి కాంగ్రెసులో చేరగానే తెలంగాణ ఆందోళన ఉధృతమైంది. దీంతో కాంగ్రెసులో చిరంజీవి పాత్రను ఖరారు చేసే విషయంపై పార్టీ అధిష్టానం దృష్టి సారించలేని స్థితిలో పడింది.

Published On October 7, 2011