జగన్ ఆస్తుల కేసు: పెన్నా ప్రతినిధులను ప్రశ్నించిన సిబిఐ

By Pratap

Published: Friday, October 7, 2011, 22:20 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి ఆస్తుల కేసులో విచారణను సిబిఐ ముమ్మరం చేసింది. దసరా పండుగ వల్ల కేసు విచారణ కాస్తా మందగించింది. తిరిగి విచారణను సిబిఐ వేగవంతం చేసింది. జగన్ ఆస్తులతో పాటు ఆయన సంస్థల్లో పెట్టుబడులు పెట్టిన వ్యక్తులు, సంస్థల ప్రతినిధులను కొద్దిరోజులుగా సిబిఐ విచారిస్తున్న విషయం తెలిసిందే. ఇందులో భాగంగా సిబిఐ అధికారులు పెన్నా సిమెంట్స్ ప్రతినిధులను శుక్రవారం ప్రశ్నించారు. మంగళవారం పెన్నా సిమెంట్స్, ముంబైకి చెందిన కార్వే సంస్థల ప్రతినిధులను విచారించింది.

హైదరాబాదులోని దిల్‌కుషా అతిథి గృహంలో సీబీఐ అధాకారులు పెన్నా ప్రతినిధులను నాలుగు గంటలపాటు విచారించారు. అనంతపురం జిల్లాలో ఉన్న పెన్నా సిమెంట్స్ జగన్ మోహన్ రెడ్డికి చెందిన భారతీ సిమెంట్స్‌లో పెట్టుబడులు పెట్టిన విషయం విదితమే. సోమవారం నుంచి ఈ కేసును సిబిఐ మరింత వేగంగా విచారిస్తుందని అంటున్నారు. జగన్ సంస్థల్లో ఎందుకు పెట్టుబడులు పెట్టారనే విషయంపైసిబిఐ అధికారులు సమగ్ర సమాచారాన్ని సేకరించినట్లు తెలుస్తోంది.

Published On October 7, 2011