తెరాసలో చేరను, ప్రజలు కోరితే పార్టీ పెడతా: నాగం

By Pratap

Published: Friday, October 7, 2011, 17:54 [IST]

హైదరాబాద్: తాను తెలంగాణ రాష్ట్ర సమితి (తెరాస)లో చేరబోనని తెలంగాణ నగారా సమితి నాయకుడు నాగం జనార్దన్ రెడ్డి స్పష్టం చేశారు. తాను ఏ పార్టీలోనూ చేరబోనని, తెలంగాణ రాష్ట్ర సాధనే తన ప్రథమ లక్ష్యమని ఆయన శుక్రవారం మీడియా ప్రతినిధుల సమావేశంలో అన్నారు. ఏ ఒక్క పార్టీ వల్ల కూడా తెలంగాణ రాష్ట్ర సాధన సాధ్యం కాదని ఆయన అన్నారు. తెరాసతో తెలంగాణ రాదని, తెరాసను కాంగ్రెసులో విలీనం చేస్తారని ఆయన అన్నారు. కాంగ్రెసును భూస్థాపితం చేస్తేనే తెలంగాణ వస్తుందని ఆయన అన్నారు.

కాంగ్రెసు విధానాలే తనను కసిని పెంచాయని, ప్రజలు కోరితే తాను పార్టీ పెడతానని ఆయన అన్నారు. తెలంగాణ ఉద్యమం ఎవరి సొత్తూ కాదని ఆయన అన్నారు. తెలంగాణ నగారాకు చెందిన జోగు రామన్న తెరాసలో చేరడానికి నిర్ణయం తీసుకున్నారు. మరో శాసనసభ్యుడు వేణుగోపాలాచారి కూడా తెరాస వైపు చూస్తున్నట్లు వార్తలు వచ్చాయి. నాగం జనార్దన్ రెడ్డితో పాటు బయటకు వచ్చి, ఆయన వెంట నడిచినవారు తెరాస వైపు వెళ్తున్నారు. ఈ స్థితిలో నాగం కూడా తెరాసలో చేరుతారని, తెలుగుదేశం పార్టీలోకి తిరిగి వెళ్తారని ఊహాగానాలు చెలరేగుతున్నాయి.

Published On October 7, 2011