వైయస్ జగన్‌కు షాక్, టిడిపిలోకి శిల్పా చక్రపాణి రెడ్డి

By Pratap

Published: Friday, October 7, 2011, 12:36 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డికి షాక్ తగిలింది. కర్నూలు జిల్లాకు చెందిన శిల్పా చక్రపాణి రెడ్డి వైయస్సార్ కాంగ్రెసుకు రాజీనామా చేసి తెలుగుదేశం పార్టీలో చేరారు. ఆయన శుక్రవారం చంద్రబాబును కలిసి పార్టీలో చేరారు. శిల్పా చక్రపాణి రెడ్డికి శ్రీశైలం శాసనసభా స్థానం టికెట్ ఇస్తానని చంద్రబాబు హామీ ఇచ్చినట్లు తెలుస్తోంది. శిల్పా చక్రపాణి రెడ్డి రెడ్డి మాజీ మంత్రి, కాంగ్రెసు నాయకుడు శిల్పా మోహన్ రెడ్డి సోదరుడు. వైయస్సార్ కాంగ్రెసు పార్టీ విధానాలు నచ్చకనే తాను బయటకు వచ్చినట్లు చక్రపాణి రెడ్డి చెప్పారు. వైయస్సార్ కాంగ్రెసు పార్టీలోని పరిణామాలు తనకు నచ్చలేదని ఆయన అన్నారు.

కాంగ్రెసు, వైయస్సార్ కాంగ్రెసు పార్టీ ఒక రహస్య అవగాహనకు వచ్చాయని కర్నూలు జిల్లాకు చెందిన తెలుగుదేశం నాయకుడు బైరెడ్డి రాజశేఖర రెడ్డి అన్నారు. చక్రపాణి రెడ్డి టిడిపిలో చేరిన సమయంలో ఆయన వెంట బైరెడ్డి రాజశేఖర రెడ్డి కూడా ఉన్నారు. వైయస్ జగన్ వెంట అంబటి రాంబాబు లాంటి వాళ్లే ఉంటారని, మిగతావారు బయటకు వచ్చేస్తారని రాజశేఖర రెడ్డి అన్నారు. చిరంజీవి తన కంపెనీని మూసేసినట్లుగానే జగన్ కూడా తన పార్టీని కాంగ్రెసులో కలిపేస్తారని ఆయన అన్నారు.

Published On October 7, 2011