కర్రల సమరం బీభత్సం, పలువురికి గాయాలు

By Pratap

Published: Friday, October 7, 2011, 8:19 [IST]

కర్నూలు: కర్నూలు జిల్లా దేవరగట్టు బన్నీ ఉత్సవం బీభత్సంగా మారింది. కర్రల సమరంలో 60 మందికి పైగా గాయపడ్డారు. వీరిలో పది మంది పరిస్థితి ఆందోళనకరంగా ఉన్నట్లు చెబుతున్నారు. దసరా సందర్భంగా దేవరగట్టులో యేటా రాత్రి పూట కర్రల సమరం జరుగుతుంది. కర్రలతో భక్తులు కొట్టుకుంటారు. మాల మల్లీశ్వర స్వామిని ఊరేగింపుగా తీసుకువచ్చి ప్రతిష్టించిన తర్వాత ఈ సమరం సాగుతుంది. పోలీసులు భారీ బందోబస్తు ఏర్పాటు చేసినా ఫలితం లేకుండా పోయింది.

భక్తులు కర్రలకు ఇనుప తొడుగులతో రావడంతో వాటితో కొట్టుకోవడం వల్ల బీభత్సంగా మారిందని అంటున్నారు. పైగా, చాలా మంది మద్యం సేవించి రావడంతో విచక్షణారహతంగా కర్రలతో కొట్టుకున్నట్లు చెబుతున్నారు. తాగి రావద్దని, కర్రలకు ఇనుప తొడుగులు ఉంచుకోవద్దని ప్రమాణం చేయించినా ఫలితం లేకుండాపోయింది. యేటా కర్రల సమరం జరుగుతున్నా భక్తుల మూఢ నమ్మకం వల్ల అదుపు చేయలేకపోతున్నారు.

Published On October 7, 2011