మాజీ మంత్రి జక్కంపూడి రామ్మోహన్ రావు మృతి

By Srinivas

Published: Sunday, October 9, 2011, 17:42 [IST]

రాజమండ్రి: మాజీ మంత్రి జక్కంపూడి రామ్మోహన్ రావు ఆదివారం మృతి చెందారు. తూర్పు గోదావరి జిల్లా రాజకీయాల్లో ఓ వెలుగు వెలిగిన జక్కంపూడి గత కొంతకాలంగా తీవ్ర అస్వస్థతో బాధపడుతున్నారు. ఆదివారం మధ్యాహ్నం మరోసారి అస్వస్థతకు గురవడంతో రాజమండ్రిలోని ఓ ప్రయివేటు ఆసుపత్రికి తరలించారు. ఆయన అక్కటే మృతి చెందారు. జక్కంపూడి 1953లో జన్మించారు. యువకుడిగా ఉన్నప్పటి నుండి రాజకీయాల్లో చురుగ్గా పాలుపంచుకునే వారు. 1989లో మొదటిసారి కడియం నుండి ఎమ్మెల్యేగా గెలుపొందారు. జిల్లా డిసిసి అధ్యక్షుడిగా సుదీర్ఘ కాలం పని చేశారు.

2004లో మరోసారి కడియం నుండి గెలుపొందిన ఆయన దివంగత ముఖ్యమంత్రి వైయస్ రాజశేఖర రెడ్డి హయాంలో ఆర్ అండ్ బి మంత్రిగా, ఎక్సైజ్ శాఖ మంత్రిగా పని చేశారు. జక్కంపూడికి భార్య, ఇద్దరు కుమారులు, ఓ కుమార్తె ఉన్నారు. కడియం నుండి మూడుసార్లు గెలుపొందారు. జక్కంపూడి మృతికి వైయస్సార్సీ పార్టీ అధ్యక్షుడు వైయస్ జగన్మోహన్ రెడ్డి, కెవిపి రామచంద్రా రావు, రాజమండ్రి ఎంపీ ఉండవల్లి అరుణ్ కుమార్, మంత్రి వట్టి వసంత్ కుమార్ సంతాపం తెలిపారు.

Published On October 9, 2011