ఏమిటిదంతా: ముఖ్యమంత్రిపై అధిష్టానం సీరియస్?

న్యూఢిల్లీ: ముఖ్యమంత్రి కిరణ్ కుమార్ రెడ్డి కాంగ్రెసు పార్టీ అధిష్టానం ఆగ్రహం వ్యక్తం చేసినట్లుగా తెలుస్తోంది. రాష్ట్రంలో తాజాగా నెలకొన్న పరిస్థితికి ముఖ్యమంత్రి కూడా ప్రధానంగా బాధ్యుడేనని అధిష్టానం భావిస్తున్నట్లుగా తెలుస్తోంది. దీంతో ఆయనపై శనివారం ఢిల్లీ పెద్దలు అసంతృప్తి వ్యక్తే చేసినట్లుగా కనిపిస్తోంది. ఆయన నిష్క్రియాపరత్వమే పరిస్థితి ఇంత వరకు రావడానికి కారణమని, అందరితోనూ ఆయన కలుపుగోలుతనంతో వ్యవహరించకపోవడంతోనే పరిస్థితి విషమించిందని అధిష్టానం భావిస్తున్నట్లుగా తెలుస్తోంది. సకల జనుల సమ్మెను సరిగా హ్యాండిల్ చేయలేకపోయారని అసంతృప్తి వ్యక్తం చేసినట్లు తెలిసింది.

తెలంగాణవాదులతో సఖ్యతను ఏర్పరచుకోలేకపోయారని తప్పుబట్టినట్లు సమాచారం. గవర్నర్ నరసింహన్ కూడా అధిష్ఠానానికి ఇదే తరహా నివేదిక సమర్పించినట్లు తెలుస్తోంది. తమ తమ ప్రాంతాల మనోభావాలను వెల్లడించే సమయంలో తెలంగాణ ప్రాంత పార్టీ నేతలు వివిధ రకాల వ్యాఖ్యలు చేశారని, వాటిని పట్టించుకున్న ముఖ్యమంత్రి వారితో శత్రువులాగా వ్యవహరించారని అభిప్రాయపడినట్లు సమాచారం. రాష్ట్రంలో ప్రస్తుతం నెలకొన్న పరిస్థితికి ఆయన బాధ్యత కూడా ఉందని కేంద్రానికి గవర్నర్ నివేదించినట్లు తెలిసింది.

సకల జనుల సమ్మె ఉద్ధృతం కావడానికి ఉద్యోగులతో కానీ, ఇతర వర్గాలతో కానీ సీఎం బాధ్యతాయుతంగా మాట్లాడకపోవడమే కారణమని ఆయన అభిప్రాయపడినట్లు సమాచారం. తెలంగాణ అంశంపై పూర్తి బాధ్యత కేంద్రానిదే అన్నట్లుగా వ్యవహరించకుండా చొరవ తీసుకుని ఆందోళనకారులతో సీఎం మాట్లాడి ఉంటే బాగుండేదని అభిప్రాయపడినట్లు తెలిసింది. అలాకాకుండా, అంటీముట్టనట్లు ఉండడం వల్లనే రాష్ట్రంలో ప్రభుత్వం లేదనే అభిప్రాయం కలిగిస్తున్నారని గవర్నర్ తన నివేదికలో పేర్కొన్నట్లు సమాచారం. వాస్తవానికి, గవర్నర్ ఈ నివేదికను సమర్పించిన తర్వాతనే సమ్మెను విరమింపజేసే బాధ్యతను కోర్ కమిటీ సభ్యులు ముఖ్యమంత్రిపై పెట్టినట్లు తెలిసింది. దీంతో తాను ఇప్పటికే చాలాసార్లు సమ్మె విరమించాల్సిందిగా ఐకాస నేతలకు విజ్ఞప్తి చేశానని కోర్ కమిటీ సభ్యులకు కిరణ్ చెప్పినట్లు వివరణ కూడా ఇచ్చారట.

English summary

It seems, Congress High Command is very serious on CM Kiran Kumar Reddy. High Command is suspecting that CM also responsibile for strike.