తెలంగాణ కోసం కొత్త పార్టీ పెట్టను: కోమటిరెడ్డి

By Srinivas

Published: Sunday, October 9, 2011, 13:00 [IST]

హైదరాబాద్: తనకు కొత్త పార్టీ పెట్టే యోచన లేదని తెలంగాణ కోసం ఉద్యమ పంథానే ఎంచుకుంటానని మాజీ మంత్రి కోమటిరెడ్డి వెంకట్ రెడ్డి ఆదివారం అన్నారు. తాను కాంగ్రెసు పార్టీలో ఉంటూనే తెలంగాణ కోసం ఉద్యమిస్తానని చెప్పారు. తెలంగాణ కోసం పోరాటం నుండి వెనక్కి తగ్గేది లేదన్నారు. ఉద్యమం ద్వారా తెలంగాణ సాధించుకుంటామన్నారు. ప్రాణాలు ఫణంగా పెట్టి అయినా తెలంగాణ సాధించుకుంటామన్నారు. ప్రత్యేక రాష్ట్రం ఇప్పుడు రాకపోతే మరెప్పుడూ రాదన్నారు.

ఢిల్లీలో తెలంగాణకు అనుకూలంగా చురుగ్గా పరిణామాలు జరుగుతున్నాయన్నారు. తెలంగాణపై కేంద్రం నుండి అనుకూల నిర్ణయం రాకపోతే ఉద్యమాన్ని మరింత ఉధృతం చేస్తామని చెప్పారు. తెలంగాణ ఇప్పుడు రాకపోతే భవిష్యత్తులో బానిస బతుకులే అన్నారు. తెలంగాణ రాజకీయ ఐక్య కార్యాచరణ సమితి రైలు రోకో కార్యక్రమంలో పాల్గొంటానని స్పష్టం చేశారు. అయితే అది శాంతియుతంగా ఉండాలన్నారు. కేంద్రంపై ఒత్తిడి చేసే దిశలో ఉద్యమాన్ని తీసుకు వెళతామన్నారు.

Published On October 9, 2011