లోకాయుక్త కోర్టులో లొంగిన యడ్యూరప్ప, జ్యుడిషియల్ కస్టడీ

By Pratap

Published: Saturday, October 15, 2011, 17:06 [IST]

బెంగళూరు: అజ్ఞాతంలోకి వెళ్లారని ఊహాగానాలు చెలరేగుతున్న నేపథ్యంలో కర్ణాటక మాజీ ముఖ్యమంత్రి యడ్యూరప్ప శనివారం సాయంత్రం లోకాయుక్త కోర్టులో లొంగిపోయారు. కోర్టు ఆయనకు వారం రోజుల పాటు జ్యుడిషియల్ రిమాండ్ విధించింది. ఈ నెల 22వ తేదీ వరకు కోర్టు ఆయనకు జ్యుడిషియల్ కస్టడీ విధించింది. దీనికి ముందు - లోకాయుక్త కోర్టు బెయిల్ నిరాకరించడంతో కర్ణాటక మాజీ ముఖ్యమంత్రి యడ్యూరప్పను అరెస్టు చేసేందుకు ఆయన ఇళ్ల వద్ద పోలీసులు పెద్ద యెత్తున మోహరించారు. ఇళ్ల వద్ద హైడ్రామా నడుస్తోంది. ఏ క్షణంలోనైనా యడ్యూరప్పను పోలీసులు అరెస్టు చేసే అవకాశం ఉందని వార్తలు వచ్చాయి. రేస్ కోర్సు రోడ్డులోని నివాసంలోనూ డాలర్స్ కాలనీలోని ఇంట్లోనూ ఆయన పోలీసులకు కనిపించలేదు. దీంతో యడ్యూరప్ప అజ్ఞాతంలోకి వెళ్లినట్లు ఊహాగానాలు చెలరేగుతున్నాయి. పోలీసులు ఆయన కోసం గాలింపు చర్యలు చేపట్టారు.

అంతకు ముందు, భూమి డీనోటిఫికేషన్ కేసులో కర్ణాటక మాజీ ముఖ్యమంత్రి యడ్యూరప్పకు లోకాయుక్త కోర్టు బెయిల్‌ను తిరస్కరించింది. యడ్యూరప్పపై కోర్టు శనివారం అరెస్టు వారంట్ జారీ చేసింది. యడ్యూరప్పపై, మరో ఐదుగురిపై నగరానికి చెందిన న్యాయవాది సిరాజిన్ బాషా ఫిర్యాదు చేశారు. ఈ ఐదుగురిలో యడ్యూరప్ప కుమారులతో పాటు అల్లుడు కూడా ఉన్నారు. బెంగళూర్ దక్షిణ తాలూకాలోని రాచెనహళ్లిలో గల భూమిని డీనోటిఫై చేయడంలో యడ్యూరప్ప ప్రభుత్వం అక్రమాలకు పాల్పడిందని, దీనివల్ల ప్రభుత్వానికి 40 కోట్ల రూపాయల మేరకు నష్టం వాటిల్లిందని న్యాయవాది ఆరోపించారు. ఈ కేసులో మాజీ మంత్రి ఎస్ఎన్ కృష్ణయ్య శెట్టి బెయిల్ దరఖాస్తును కూడా కోర్టు తిరస్కరించింది. యడ్యూరప్ప కుమారులకు, అల్లుడికి మాత్రం బెయిల్లు లభించాయి.

Published On October 15, 2011