నిజామాబాద్‌లో కెసిఆర్, కోదండరామ్‌లపై కేసు నమోదు

By Pratap

Published: Saturday, October 15, 2011, 15:53 [IST]

నిజామాబాద్: నిజామాబాద్ వన్ టౌన్ పోలీసులు తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుపై, తెలంగాణ రాజకీయ జెఎసి చైర్మన్ కోదండరామ్‌పై కేసు నమోదు చేశారు. రైల్వే పోలీసుల ఫిర్యాదు మేరకు నిజామాబాద్ వన్ టౌన్ పోలీసులు కేసు నమోదు చేశారు. మొత్తం పది మందిపై ఈ కేసు నమోదు చేశారు. వారిలో కెసిఆర్, కోదండరామ్ ఉన్నారు. తమ విధులకు ఆటంకం కలిగించే విధంగా, ప్రజలను రెచ్చగొట్టే విధంగా వారు పిలుపునిచ్చారని రైల్వే పోలీసులు ఫిర్యాదు చేశారు. రైల్వే చట్టం ప్రకారం కూడా వారిపై కేసు నమోదు చేసే అవకాశం ఉంది.

రైల్వే రోకో సందర్భంగా అరెస్టయిన తెరాస శాసనసభ్యుడు ఏనుగు రవీందర్ రెడ్డి పోలీసుల నుంచి తప్పించుకుని ఫోర్త్ టౌన్ పోలీసు స్టేషన్ నుంచి పారిపోయారు. దీంతో పోలీసులు ఆయనను మళ్లీ నిజామాబాద్ జిల్లా డిచ్‌పల్లి వద్ద అరెస్టు చేశారు. రైల్ రోకో సందర్భంగా అరెస్టయిన నాయకులపై పోలీసులు కఠినంగా వ్యవహరించే అవకాశం ఉంది. వారిపై కేసులు నమోదు చేసి, చట్టప్రకారం చర్యలు తీసుకునేందుకు వారు సమాయత్తమవుతున్నారు. రైల్ రోకో సందర్భంగా తెలంగాణవ్యాప్తంగా పలువురు తెరాస, కాంగ్రెసు నేతలను పోలీసులు అరెస్టు చేశారు. తాము బయటకు వస్తే పోలీసులు అరెస్టు చేస్తారనే ఉద్దేశంతో కెసిఆర్, కోదండరామ్ శనివారం హైదరాబాదులోని తెరాస కార్యాలయంలోనే ఉండిపోయారు. అక్కడి నుంచే తెలంగాణ జిల్లాల్లోని రైలో రోకో కార్యక్రమాన్ని పర్యవేక్షిస్తూ వచ్చారు.

Published On October 15, 2011