వెంబడించి పొన్నం ప్రబాకర్‌ను అరెస్టు చేసిన పోలీసులు

By Pratap

Published: Saturday, October 15, 2011, 11:33 [IST]

కరీంనగర్, వరంగల్, నల్లగొండ: తమ నుంచి తప్పించుకోవడానికి ప్రయత్నించిన కాంగ్రెసు పార్లమెంటు సభ్యుడు పొన్నం ప్రభాకర్‌ను, మాజీ మంత్రి జీవన్ రెడ్డిని పోలీసులు శనివారం వెంబడించి అరెస్టు చేశారు. కరీంనగర్ జిల్లా అల్గునూర్ చౌరస్తాలో పోలీసులు వారిని పట్టుకుని అరెస్టు చేశారు. జమ్మికుంట రైల్వే స్టేషనులో వారిద్దరిని పోలీసులు అరెస్టు చేశారు. అయితే, వారు పోలీసుల నుంచి తప్పించుకుని కారులో పారిపోవడానికి ప్రయత్నించారు. దీంతో పోలీసులు వారిని అల్గునూర చౌరస్తా వద్ద అడ్డగించారు. ఈ సమయంలో పోలీసులతో తెలంగాణవాదులు వివాదానికి దిగారు. పొన్నం ప్రభాకర్‌ను, జీవన్ రెడ్డిని పోలీసులు అరెస్టు చేశారు. రైల్ రోకో కార్యక్రమం సందర్భంగా ఈ సంఘటన చోటు చేసుకుంది.

వరంగల్ జిల్లాలో కాంగ్రెసు పార్లమెంటు సభ్యుడు రాజయ్యను పోలీసులు అరెస్టు చేశారు. ఆందోళన చేస్తున్న ఆందోళనకారులను నిర్బంధించడం సరి కాదని ఆయన అన్నారు. తెలంగాణ ప్రజలంతా తెలంగాణ రాష్ట్రాన్ని కోరుకుంటున్నారని ఆయన అన్నారు. ప్రజలు స్వచ్ఛందంగానే రైళ్లను ఎక్కడం మానేశారని ఆయన అన్నారు. నల్లగొండ జిల్లా భువనగిరి రైల్వే స్టేషనులో పోలీసులు కాంగ్రెసు పార్లమెంటు సభ్యులు కె. కేశవరావును, కోమటిరెడ్డి రాజగోపాల్ రెడ్డిని పోలీసులు అరెస్టు చేశారు. ఇప్పటికైనా తెలంగాణ కోసం ఈ ప్రాంత మంత్రులు రాజీనామా చేయాలని కోమటిరెడ్డి రాజగోపాల్ రెడ్డి డిమాండ్ చేశారు. వరంగల్ జిల్లా మహబూబా బాద్‌లో కాంగ్రెసు పార్లమెంటు సభ్యుడు బలరాం నాయక్‌ను పోలీసులు అరెస్టు చేశారు.

Published On October 15, 2011