సిఎం కిరణ్, చంద్రబాబు కుమ్మక్కయ్యారు: పోచారం

By Srinivas

Published: Monday, October 17, 2011, 11:54 [IST]

నిజామాబాద్: తెలుగుదేశం పార్టీ అధినేత నారా చంద్రబాబు నాయుడు, ముఖ్యమంత్రి కిరణ్ కుమార్ రెడ్డి కుమ్మక్కై తన మెజార్టీ తగ్గించి తద్వారా తెలంగాణ వాదాన్ని బలహీనపర్చాలని కుట్ర పన్నారని అందుకే తన ఆధిక్యత తగ్గిందని బాన్సువాడ ఉప ఎన్నికలలో గెలుపొందిన తెలంగాణ రాష్ట్ర సమితి అభ్యర్థి పోచారం శ్రీనివాస్ రెడ్డి సోమవారం అన్నారు. తెలంగాణ తెలుగుదేశం పార్టీ నేతలు తెలంగాణ ద్రోహులుగా మారారని విమర్శించారు. ఆనాడు కాంగ్రెసుకు వ్యతిరేకంగా ఎన్టీఆర్ స్థాపించిన తెలుగుదేశం పార్టీ ఇప్పుడు కాంగ్రెసుకు మద్దతు పలుకుతుందని ఊహించలేదన్నారు. తన గెలుపు తెలంగాణ ప్రజలదే అన్నారు. టిడిపి, కాంగ్రెసు కుమ్మక్కై మెజార్టీ తగ్గించాలని చూసినప్పటికీ తాను యాభై వేల మెజార్టీతో గెలవటం సామాన్య విషయం కాదన్నారు.

ప్రభుత్వ, ప్రతిపక్ష పార్టీలు కుయుక్తులు పన్నినా తెలంగాణవాదం బలహీనపడలేదన్నారు. తన గెలుపుతోనైనా కేంద్ర, రాష్ట్ర ప్రభుత్వాలు కళ్లు తెరవాలన్నారు. ఇప్పటికైనా వెంటనే తెలంగాణ రాష్ట్రాన్ని ప్రకటించాలని డిమాండ్ చేశారు. తనను ఓడించాలని చేసిన ఎవరి కుట్రలు ఫలవంతం కాలేదన్నారు. కాంగ్రెసు నేతలు కేవలం డిపాజిట్ దక్కించుకోవడానికే ప్రయత్నించారన్నారు.

Published On October 17, 2011