తెలంగాణ వంట చేసినంత ఈజీ కాదు: రేణుకా చౌదరి

By Srinivas

Published: Tuesday, October 18, 2011, 8:49 [IST]

న్యూఢిల్లీ: ప్రెషర్ కుక్కర్‌లో రెండు కూతలొస్తే వంట అయిపోయిందన్నంత ఈజీగా తెలంగాణ ఏర్పాటు అంశంపై మాట్లాడలేమని ఏఐసిసి అధికార ప్రతినిధి రేణుకా చౌదరి సోమవారం న్యూఢిల్లీలో అభిప్రాయపడ్డారు. తెలంగాణ రాష్ట్రాన్ని ఏర్పాటు చేయడమంటే వంట చేయడం కాదన్నారు. తెలంగాణపై నిర్ణయం ఎప్పటిలోగా వస్తుందని విలేకరులు ప్రశ్నించినప్పుడు ఆమె పై విధంగా స్పందించారు. ఐథే సత్వర పరిష్కారం లభించాలనే తాను కోరుకుంటున్నట్లు చెప్పారు. తెలంగాణ అంశం ప్రజలతో ముడిపడిన సమస్య అని, ప్రజలందరితోనూ సౌమ్యంగా మాట్లాడి పరిష్కరించాల్సి ఉందన్నారు.

ఏమైనా ఉంటే చర్చల ద్వారానే పరిష్కరించుకోవాలని చెప్పారు. పార్టీ ప్రధాన కార్యదర్శి అందరితోనూ మాట్లాడుతున్నారు. ముఖ్యమంత్రి, సంబంధిత వ్యక్తులంతా కూడా చర్చలు జరుపుతున్నారు. అయితే అంతర్గతంగా ఏమి చర్చిస్తున్నామో కాంగ్రెస్ బహిరంగంగా చెప్పబోదన్నారు. ప్రజాస్వామ్యంలో ఆందోళన చేసే హక్కు అధికారం అందరికీ ఉందని కాని సమాజంలో ఏ వర్గమూ గాయపడకుండా, నష్టపోకుండా, దారి తప్పకుండా చూసుకోవాలన్నారు.

నవంబర్ 5 లోగా నిర్ణయం వెలువడుతుందన్న వార్తల్ని ప్రస్తావించగా తనకు తెలియదని చెప్పారు. దీపావళి పండుగకు చీకట్లు తొలగి, అందరూ కలసి వేడుక జరుపుకోవాలని ఆకాంక్షించారు. బాన్సువాడ ఉప ఎన్నికలపై స్పందిస్తూ గెలుపు ఓటములనేవి ప్రజాస్వామ్యంలో సహజమన్నారు. అయితే ఇప్పుడున్న పరిస్థితుల్లో కాంగ్రెస్ అభ్యర్థికి ఆ మాత్రం ఓట్లు రావటం గొప్ప విషయమని తెలిపారు. సీఎం, గవర్నర్‌లు ఢిల్లీ వచ్చిన తర్వాత సమ్మెను అణచి వేస్తున్నారన్న వ్యాఖ్యల్ని ఆమె కొట్టి పారేశారు.

Published On October 18, 2011