యడ్యూరప్ప బెయిల్ పిటిషన్‌పై విచారణ వాయిదా

బెంగళూరు: ప్రభుత్వ భూముల డీనోటిఫికేషన్, భూములకు సంబంధించిన అక్రమాల కేసులో బెయిల్ కోసం కర్ణాటక మాజీ ముఖ్యమంత్రి యడ్యూరప్ప పెట్టుకున్న బెయిల్ పిటిషన్‌పై కర్ణాటక లోకాయుక్త విచారణను ఈ నెల 20వ తేదీకి వాయిదా వేసింది. బెయిల్ కోసం యడ్యూరప్ప సోమవారం పిటిషన్ దాఖలు చేశారు. అరెస్టు అనివార్యమైన స్థితిలో యడ్యూరప్ప శనివారంనాడు లోకాయుక్త కోర్టు ముందు లొంగిపోయిన విషయం తెలిసిందే.

మధ్యంతర బెయిల్ పిటిషన్‌ అయినందు వల్ల దీనిపై విచారణను త్వరగా ముగించాల్సి ఉంటుందని యడ్యూరప్ప తరఫు న్యాయవాది రవి బి నాయక్ అన్నారు. యడ్యూరప్పకు ఈ నెల 22వ తేదీ వరకు జ్యుడిషియల్ రిమాండ్ విధిస్తూ ఈ నెల 15వ తేదీన కోర్టు ఆదేశాలు జారీ చేసింది. యడ్యూరప్పపై బాషా అనే న్యాయవాది ఐదు ప్రైవేట్ ఫిర్యాదు దాఖలు చేసిన విషయం తెలిసిందే. అనారోగ్యంతో ఆస్పత్రిలో చికిత్స పొందుతున్న యడ్యూరప్పను మంగళవారం సాయంత్రం డిశ్చార్జీ చేసే అవకాశం ఉందని జయదేవ ఆస్పత్రి డైరెక్టర్ డాక్టర్ సిఎన్ మంజునాథ్ చెప్పారు.

English summary

The Karnataka High Court on Tuesday adjourned to October 20 the hearing on the interim bail plea of former chief minister BS Yeddyurappa, arrested in connection with alleged irregularities in denotifying government lands.