ఎన్డీసీలో తెలంగాణ ప్రస్తావన లేవనెత్తని ముఖ్యమంత్రి

న్యూఢిల్లీ: ముఖ్యమంత్రి కిరణ్ కుమార్ రెడ్డి శనివారం న్యూఢిల్లీలో జరిగిన జాతీయ అభివృద్ధి మండలి సమావేశంలో తెలంగాణ అంశాన్ని ఎక్కడా ప్రస్తావించలేదు. ఆయన రాష్ట్ర అభివృద్ధిపై సమావేశంలో వివరించారు. అయితే ఇటీవల తెలంగాణలో సకల జనుల సమ్మె, ఉద్యమం నేపథ్యంలో రాష్ట్రంపై ప్రభావం పడిన విషయం తెలిసిందే. ఈ అంశాన్ని ముఖ్యమంత్రి ఎక్కడా ఎత్తక లేదు. అయితే అభివృద్ధికి శాంతిభద్రతలు చాలా ముఖ్యమని పేర్కొనడం గమనార్హం. రాష్ట్రంలో జలయజ్ఞం, వ్యవసాయ అభివృద్ధిపై ఆయన వివరించారు. జలయజ్ఞం కింద రాష్ట్ర ప్రభుత్వం ఎనభై ఆరు ప్రాజెక్టులు చేపట్టిందని, తద్వారా కొత్తగా ఇరవై రెండు లక్షల ఎకరాలకు సాగునీటి సౌకర్యం, కోటి ఎకరాల కొత్త ఆయకట్టు లక్ష్యంగా కృషి చేస్తున్నట్టు చెప్పారు. ఈ ప్రాజెక్టుల కోసం ప్రభుత్వం 53 వేల కోట్ల రూపాయలు ఖర్చు చేసిందని చెప్పారు. 29 లక్షల పంపు సెట్లకు ఉచిత విద్యుత్ అందిస్తున్నట్లు చెప్పారు.

26 లక్షల మంది కౌలు రైతులకు రుణ అర్హత పత్రాలు అందించామని, వచ్చే మూడేళ్లలో 48 ప్రాజెక్టులు పూర్తి చేస్తామని చెప్పారు. 12వ పంచవర్ష ప్రణాళికలోగా పది శాతం వృద్ధి లక్ష్యంగా పెట్టుకున్నట్లు చెప్పారు. 27 లక్షల విద్యార్థులకు స్కాలర్ షిప్పులు అందాయని, ఆరోగ్యశ్రీ ద్వారా 13 లక్షలకు ఆపరేషన్లు జరిగాయని చెప్పారు. సకాలంలో రుణాలు చెల్లించే రైతులకు వచ్చే రబీ నుంచి వడ్డీ లేని రుణం ఇస్తామని ప్రకటించారు. రాష్ట్రాభివృద్ధికి సహయవాయు వనరులను మరింత ఉపయోగిస్తామని చెప్పారు. వచ్చే నెల 2వ తేది నుండి రెండో దశ రచ్చబండ ప్రారంభమవుతుందన్నారు.

English summary

CM Kiran Kumar Reddy avoided Telangana issue in NDC meeting at New Delhi today. He described state development and government activities.