రామోజీ, రాధాకృష్ణ తప్పు అంగీకరించినట్టే: గట్టు

By Srinivas

Published: Saturday, October 22, 2011, 16:58 [IST]

హైదరాబాద్: కడప పార్లమెంటు సభ్యుడు వైయస్ జగన్మోహన్ రెడ్డి ఇంటికి సంబంధించి తప్పుడు కథనాలు ప్రసారం చేసిన మీడియా సంస్థలు తాము సవాల్ విసిరి ఇరవై నాలుగు గంటలు గడిచినా స్పందించలేదంటే వారు తాము చేసిన తప్పు అంగీకరించినట్లేనని వైయస్సార్ కాంగ్రెసు పార్టీ అధికార ప్రతినిధి గట్టు రామచంద్రా రావు శనివారం అభిప్రాయపడ్డారు. తాము వేసిన ప్రశ్నలకు రామోజీ రావు, రాధాకృష్ణ, రవి ప్రకాశ్ సమాధానం చెప్పాల్సి ఉందన్నారు. అలాగే తాము చేసిన ఆరోపణలకు కూడా వారి నుండి ఎలాంటి సమాధానం రానందున వాటిని నిజమని భావించాల్సి వస్తుందన్నారు. జరిగిన పొరపాటు అంగీకరించడం తప్పేమీ కాదని అలా చేస్తే మీడియా విలువలు కాపాడినట్లవుతుందన్నారు. కానీ వారు మీడియా గౌరవం పెంపొందించేలా నడుచుకోవడం లేదన్నారు. ఆ పత్రికలకు, ఛానళ్లకు కళ్లు, చెవులు రెండూ లేవన్నారు.

మా ఆరోపణలకు సమాధానం చెప్పాల్సిన బాధ్యత వారిపై ఉందన్నారు. రాజకీయాల్లోకి రావాలంటే నేరుగా రావాలి. కానీ మీడియాను అడ్డు పెట్టుకొని కుతంత్రాలు చేయవద్దని కోరారు. మీడియా తటస్థంగా వ్యవహరించాలని, తప్పుడు రాతలు మానుకోవాలన్నారు. ఒక వ్యక్తిని అధికారంలోకి తీసుకు రావడానికి వారు సర్వశక్తులూ ఒడ్డుతున్నారన్నారు. అతనిని ప్రజలు తిరస్కరించినప్పటికీ వారు మాత్రం అతన్ని అధికారంలోకి తీసుకు రావాలని ప్రయత్నిస్తున్నాయన్నారు. అబ్దుల్లాపూర్ నుంచి ఫిల్మ్ సిటీ వరకు ఉన్న రోడ్డు స్థలం ఎవరిదో చెప్పాలని ప్రశ్నించారు.

Published On October 22, 2011