తెలంగాణపై ప్రశ్న: మీడియాపై డిఎస్ సీరియస్

By Srinivas

Published: Monday, October 24, 2011, 11:36 [IST]

హైదరాబాద్: మాజీ ప్రదేశ్ కాంగ్రెసు కమిటీ అధ్యక్షుడు ధర్మపురి శ్రీనివాస్ తెలంగాణ అంశంపై నోరు మెదపలేదు. అంతేకాదు తెలంగాణ విషయంపై మీడియా ప్రశ్నిస్తే కాస్త ఆగ్రహం కూడా వ్యక్తం చేశారు. సోమవారం మధ్యాహ్నం పన్నెండున్నర గంటలకు ఆయన శాసనమండలి సభ్యత్వానికి నామినేషన్ వేయనున్నారు. ఈ సందర్భంగా ఆయన ఉదయం గాంధీ భవనం వచ్చారు. తెలంగాణపై అధిష్టానం నిర్ణయం ఏముంటుందని భావిస్తున్నారని విలేకరులు ప్రశ్నించగా ఆయన ఏమీ మాట్లాడలేదు. అంతేకాదు ప్రశ్నించిన మీడియా ప్రతినిధులపై ఒకింత అసహనం, ఆగ్రహం వ్యక్తం చేశారు.

అదే సమయంలో అంతకుముందు ఆయన మీడియాతో మాట్లాడారు. ఎమ్మల్సీ స్థానాన్ని కేటాయించినందుకు ఏఐసిసి అధ్యక్షురాలు సోనియా గాంధీ, కేంద్ర మంత్రి, రాష్ట్ర వ్యవహారాల ఇంచార్జ్ గులాం నబీ ఆజాద్‌, తనకు ఎమ్మెల్సీ దక్కడానికి కృషి చేసిన ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ, ముఖ్యమంత్రి కిరణ్ కుమార్ రెడ్డికి కృతజ్ఞతలు తెలిపారు. తన సేవలు గుర్తించి సీటు కేటాయించడంపై ఆయన సంతోషం వ్యక్తం చేశారు. పార్టీలో ఇది తనకు గుర్తింపే అన్నారు. కాగా డిఎస్‌కు మంత్రులు టిజి వెంకటేష్, బస్వరాజు సారయ్య, ఎమ్మెల్యే అనీల్ అభినందనలు తెలియజేశారు. డిఎస్‌కు ఎమ్మెల్సీ దక్కడంపై కాంగ్రెసు వర్గాల్లో హర్షాతిరేకాలు వ్యక్తమవుతున్నాయి.

Published On October 24, 2011