లూసియానా గవర్నర్‌గా మళ్లీ బాబీ జిందాల్

న్యూ ఓర్లీన్స్: లూసియానా గవర్నర్‌గా మరోసారి భారత సంతతికి చెందిన బాబీ జిందాల్ ఎన్నికయ్యారు. శనివారం జరిగిన ఎన్నికలలో రిపబ్లికన్ పార్టీ తరఫున పోటీ చేసిన బాబీ జిందాల్ సమీప డెమక్రటిక్ అభ్యర్థి తారా హోలీస్‌‌పై భారీ మెజార్టీతో గెలుపొందారు. మొత్తం 99 శాతం ఓట్లు పోలవగా ఆయనకు 66 శాతం ఓట్లు, తారా హోలిస్‌కు 18 శాతం ఓట్లు వచ్చాయి. నేను మరో నాలుగేళ్లు గవర్నర్‌గా ఉండేందుకు మీరు నన్ను ఎన్నుకున్నారని గెలుపు అనంతరం వ్యాఖ్యానించారు. మరో నాలుగేళ్లు మనం బాగా పని చేయాల్సి ఉంటుందన్నారు.

ఈ ఎన్నికల్లో తొమ్మిది మంది అభ్యర్థులు పాల్గొన్నారు. వారందరిపై జిందాల్ అలవోకగా నెగ్గారు. ప్రస్తుతం కూడా లూసియానా గవర్నర్‌గా ఉన్న జిందాల్ 2007వ సంవత్సరంలో 57 శాతం ఓట్లతో గెలుపొందారు. ఈసారి అంతకంటే ఎక్కువ వోట్లు రావడం విశేషం. గతంలో గెలుపొందినప్పుడు అమెరికా చరిత్రలోనే అతి పిన్న వయసులో గవర్నర్ పదవి పొందిన భారత సంతతికి చెందిన తొలి వ్యక్తిగా రికార్డులకెక్కారు.

English summary

Louisiana governor Bobby Jindal, seen as a rising star in the Republican Party, won re-election on Saturday as voters largely ignored his nine poorly funded challengers.