ప్రజాప్రతినిధుల 72 గంటల దీక్ష: కోదండరామ్

By Srinivas

Published: Monday, October 24, 2011, 12:25 [IST]

హైదరాబాద్: ప్రత్యేక తెలంగాణ రాష్ట్ర సాధనలో భాగంగా ఈ ప్రాంత ప్రజా ప్రతినిధులు నవంబర్ 1వ తేదిన 72 గంటల పాటు దీక్ష చేస్తారని తెలంగాణ రాజకీయ ఐక్య కార్యాచరణ సమితి చైర్మన్ ఆచార్య కోదండరామ్ సోమవారం ప్రకటించారు. సమ్మె, భవిష్యత్తు కార్యాచరణ కోసం తెలంగాణ స్టీరింగ్ కమిటీ సమావేశమయింది. సమావేశం అనంతరం కోదండరామ్ మీడియాతో మాట్లాడారు. తెలంగాణకు సానుకూలంగా ఉన్న అన్ని పార్టీల ప్రజాప్రతినిధులతో దీక్షపై మాట్లాడతామని చెప్పారు. తెలంగాణపై స్పష్టత ఉన్న పార్టీల నేతలనే దీక్షకు ఆహ్వానిస్తామని చెప్పారు. దీక్షకు సంబంధించిన పూర్తి వివరాలు త్వరలో తెలియజేస్తామన్నారు. నవంబర్ 1వ తేదిని తెలంగాణ ప్రజలందరూ విద్రోహ దినంగా పాటించాలన్నారు.

ఆ రోజు అందరి ఇళ్ల పైన నల్ల జెండాలు ఎగుర వేయాలని ప్రజలకు ఆయన పిలుపునిచ్చారు. రాష్ట్ర వ్యవహారాల ఇంచార్జ్ గులాం నబీ ఆజాద్ తెలంగాణపై చేసిన వ్యాఖ్యలను ఖండిస్తున్నామన్నారు. తాము కాలపరిమితితో కూడిన రోడ్ మ్యాప్ కోరితే కేంద్రం నుండి ఎలాంటి స్పందన రాకపోవడం శోచనీయమన్నారు. కేంద్రం ఇప్పటికైనా తెలంగాణ ఎప్పటిలోగా ప్రకటిస్తుందో చెప్పాలన్నారు. కాగా జ్యూడిషియల్ ఎంప్లాయిస్ సమ్మెను వాయిదా వేసుకున్నారు. ఈ నెల 29న తెలంగాణ న్యాయవాదులు చలో పోలవరంకు పిలుపునిచ్చారు.

Published On October 24, 2011