జైపాల్, కోదండరామ్ రహస్య ఒప్పందం: గజ్జెల కాంతం

By Srinivas

Published: Monday, October 24, 2011, 16:50 [IST]

హైదరాబాద్: కేంద్ర పెట్రోలియం శాఖ మంత్రి జైపాల్ రెడ్డి, తెలంగాణ రాజకీయ ఐక్య కార్యాచరణ సమితి చైర్మన్ ఆచార్య కోదండరామ్ మధ్య జరిగిన రహస్య ఒప్పంద వల్లే ప్రత్యేక తెలంగాణ కోసం జరుగుతున్న సకల జనుల సమ్మె విరమణ దిశగా వెళుతోందని ప్రజా సంఘాల ఐక్య కార్యాచరణ సమితి కన్వీనర్ గజ్జెల కాంతం సోమవారం ఆరోపించారు. సకల జనుల సమ్మెలో పాల్గొన్న ఉద్యోగులకు ప్రభుత్వం జీతాలు ఇస్తుంది. కానీ ఈ ప్రభావంతో నష్ట పోయిన రైతులకు, కూలీలకు నష్టపరిహారం ఎవరు ఇస్తారని ఆయన ప్రశ్నించారు. తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావుతో కలిసి కోదండరామ్ ఢిల్లీ ఎందుకు వెళ్లారో చెప్పాలని డిమాండ్ చేశారు.

వారు గుత్తాధిపత్యం కోసం కుట్ర చేస్తున్నారని ఆరోపించారు. తెలంగాణ ప్రజలు సెంటిమెంటు పేరుతో మరోసారి మోసం చేయడానికి కోదండరామ్ రెడ్డి ప్రయత్నిస్తున్నారన్నారు. బినామీ పేర్లతో కాంట్రాక్టులు దక్కించుకొని ఉద్యమాన్ని వెనక్కి నెట్టి ప్రజలను మోసం చేస్తున్నారని ఆరోపించారు. గతంలో తెలంగాణకు వ్యతిరేకంగా ఉన్న న్యూడెమోక్రసితో జెఏసి ఎందుకు పని చేస్తుందన్నారు.

Published On October 24, 2011