అద్వానీ జన చైతన్య యాత్రలో ఆర్డీఎక్స్ బాంబు కలకలం

By Srinivas

Published: Friday, October 28, 2011, 11:06 [IST]

చెన్నై: భారతీయ జనతా పార్టీ అగ్ర నేత లాల్ కృష్ణ అద్వానీ జన చైతన్య యాత్రలో శుక్రవారం బాంబు కలకలం చోటు చేసుకుంది. అద్వానీ శుక్రవారం తమిళనాడులోని మధురైలో జన చైతన్య యాత్రలో ఉన్నారు. మధురై నుండి శ్రీవిల్లిపుత్తూరు మార్గంలో ఓ బ్రిడ్జి కింద తమిళనాడు పోలీసులు ఆరు బాంబులను కనుగొన్నారు. మధురై శివారులోని అలంగుడి వద్ద పోలీసులు ఈ పైప్ బాంబులను కనుగొన్నారు. ఇవి ఆర్డీఎక్స్ బాంబులుగా తెలుస్తోంది. ఆయన యాత్ర ఇదే మార్గంలో కొనసాగుతోంది.

కాగా మధురైలో అద్వానీ కాంగ్రెసు పార్టీపై విరుచుకు పడ్డారు. పూర్తి అవినీతిలో కూరుకు పోయిన కాంగ్రెసు తన పార్టీ నేతలను కాపాడుకుంటూ మిత్ర పక్షాలపై చర్యలు తీసుకుంటుందని ధ్వజమెత్తారు. తాజా కుంభకోణాలకు కాంగ్రెసు పార్టీయే బాధ్యత వహించాలన్నారు. దీపావళి పర్వదినం కారణంగా అద్వానీ రెండు రోజుల పాటు తన యాత్రను వాయిదా వేసుకున్న తర్వాత శుక్రవారం మళ్లీ ప్రారంభించారు.

Published On October 28, 2011