చేతులు జోడించి చెబుతున్నా: జూపల్లి కృష్ణా రావు

By Srinivas

Published: Monday, October 31, 2011, 16:37 [IST]

హైదరాబాద్: తెలంగాణ ప్రాంత శాసనసభ్యులు, మంత్రులకు తాను చేతులు జోడించి చెబుతున్నానని మీరంతా తెలంగాణ ఆత్మ గౌరవం కోసం, స్వపరిపాలన కోసం ప్రజల పక్షం వహించాలని మాజీ మంత్రి జూపల్లి కృష్ణా రావు కోరారు. సీమాంధ్ర పెట్టుబడిదారులకు తలొగ్గి కాంగ్రెసు తెలంగాణను ఆలస్యం చేస్తుందన్నారు. ప్రజలు రాళ్లు విసిరినా, చెప్పులు వేసినా, చావు డబ్బులు కొట్టినా ఇంకా మంత్రులు పదవులు పట్టుకొని వేలాడుతున్నారన్నారు. తెలంగాణ కోసం ఓయులో తాను, మాజీ మంత్రి కోమటిరెడ్డి వెంకట్ రెడ్డి, మంత్రి శ్రీధర్ బాబులం ప్రమాణం చేశామని తామిద్దరం రాజీనామా చేసినప్పటికీ శ్రీధర్ ఇప్పటి వరకు ఎందుకు రాజీనామా చేయలేదని ప్రశ్నించారు. పార్టీ ప్రజావ్యతిరేక కార్యక్రమాలు చేసినప్పుడు తమ లక్ష్య సాధన కోసం పార్టీని వీడామని దానిని వక్రీకరించి మాట్లాడటం సరికాదన్నారు.

సిబిఐ ఎంక్వయిరీ వేయించాలని సవాల్ విసిరారు. శ్రీధర్ బాబు సీమాంధ్ర పక్షం వహించి తెలంగాణ విద్యార్థుల, ప్రజల సమస్యలను, ఆకాంక్షలను పట్టించుకోవడం లేదన్నారు. చేతకాని మంత్రులుగా ఉండటం ఎందుకన్నారు. లగడపాటి, రాయపాటి డబ్బు బలంతో తెలంగాణ అడ్డుకున్నారన్నారు. అధికార పార్టీ శాసనసభ్యులు, మంత్రులగా ఉండి బయటకు వస్తే స్వప్రయోజనాల కోసం ఎలా అవుతుందని ప్రశ్నించారు. దమ్ముంటే తమ రాజీనామాలు ఆమోదించాలని సవాల్ విసిరారు. మంత్రులు తమ రాజీనామా లేఖలను గవర్నర్‌కు ఎందుకు ఇవ్వట్లేదని ప్రశ్నించారు. ఎమ్మెల్యేలు రాజయ్య, సోమారపు సత్యనారాయణలు కూడా కాంగ్రెసు నేతల వ్యాఖ్యలపై మండిపడ్డారు.

Published On October 31, 2011